राजापूर नगरपालिका निवडणूक महाविकास आघाडी म्हणून एकत्र लढणार

विकास आघाडीच्या प्रमुख पदाधिकाऱ्यांची पत्रकार परिषदेत घोषणा

राजापूर : राजापूर नगरपालिकेची निवडणूक महाविकास आघाडी म्हणूनच एकत्र लढविणार असल्याची घोषणा करत आघाडीच्या नेत्यांनी निवडणुकीचे रणशिंग फुंकले आहे. राजापूर येथे पार पडलेल्या संयुक्त पत्रकार परिषदेत येथील काँग्रेस कार्यालयात महाविकास आघाडीच्या वतीने आयोजित पत्रकार परिषदेत शिवसेना उद्धव बाळासाहेब ठाकरे गटाचे नेते आणि माजी आमदार गणपतराव कदम, काँग्रेसच्या माजी विधानपरिषद सदस्या ॲड. हुस्नबानू खलिफे, शिवसेना ठाकरे गटाचे विधानसभा क्षेत्राचे संपर्कप्रमुख ॲड. चंद्रप्रकाश नकाशे आदी प्रमुख मान्यवर उपस्थित होते.

आघाडीतील चारही पक्षामध्ये चांगला समन्वय असून जगवाटपाबाबत चांगली बोलणी झाली आहेत. आघाडीचे उमेदवार कोण असतील आणि कोणते पक्ष किती जागा लढवतील ते अर्ज सादर करताना दिसेल. नगराध्यक्ष पदासह स्पष्ट बहुमत मिळवून राजापूर नगर परिषदेवर आघाडीचाच झेंडा फडकेल, असा आत्मविश्वास आघाडीच्या नेत्यांनी पत्रकार परिषदेत व्यक्त केला.

नगरपालिकेच्या निवडणुकीसाठी लवकरच अर्ज सादर करायला सुरुवात होणार आहे. नगर परिषद निवडणुकीत महायुतीसह महा आघाडी होणार का याबाबत कमालीची उत्सुकता लागली असतानाच शिवसेना ठाकरे गट, काँग्रेस पक्ष, राष्ट्रवादी काँग्रेस शरद पवार गट आणि मनसे या चार प्रमुख पक्षांच्या महाविकास आघाडीच्या वतीने शनिवारी राजापूरमध्ये पत्रकार परिषद घेण्यात आली.

यावेळी बोलताना माजी आमदार गणपतराव कदम म्हणाले की, “राजापूर तालुक्यात शिवसेना आणि काँग्रेस एकमेकांच्या विरुद्ध लढायची. पण आता आम्हाला नियतीने एकत्र आणले आहे. या निवडणुकीत ठाकरे सेना, काँग्रेस, राष्ट्रवादी काँग्रेस शरद पवार गट, मनसे अशी महाविकास आघाडी झालेली आहे आणि ही निवडणूक आम्ही महाविकास आघाडी म्हणून लढणार आहोत; मात्र कोणत्या प्रभागात उमेदवार कसे असतील आणि आघाडीतील जागांचे वाटप कसे असेल ते उमेदवारी अर्ज सादर करताना दिसेल असे त्यांनी सांगितले.
नगराध्यक्ष पदाचा आघाडीचा उमेदवार निश्चित झालेला आहे; मात्र त्याची घोषणा वरिष्ठ पातळीवरून होणार असल्याचे त्यांनी स्पष्ट केले.
या निवडणुकीत वीसच्या वीस जागा महाविकास आघाडी म्हणून लढणार असून, महाविकास आघाडी स्पष्ट बहुमत घेऊ अशी आम्हाला खात्री असल्याचा विश्वासही कदम यांनी व्यक्त केला.
माजी विधान परिषदेच्या आमदार ॲड. हुस्नाबानू खलिफे यांनी निवडून येणारा उमेदवार हेच सूत्र असल्याचे स्पष्ट केले. नगरपालिका निवडणुकीत आम्ही महाविकास आघाडी म्हणून लढत आहोत. त्याशिवाय राजापूर शहरातील काही पतसंस्था, सामाजिक संस्था, मंडळे, बँकांचे संचालक, आदी संस्थांशी सुद्धा आम्हाला पाठिंबा देण्यासाठी संपर्क सुरू असल्याचे त्यांनी सांगितले.
काँग्रेस पक्षाची काही मंडळी ही शिंदे शिवसेनेच्या संपर्कात असून त्या पक्षात प्रवेश करणार असल्याच्या वृत्ताबाबत विचारले असता कोण कुणाला भेटले म्हणजे तो पक्ष प्रवेश होत नाही. राजकीय गाठीभेटी होत असतात आम्हाला देखील कोण कोण भेटत असतात. आम्ही महाविकास आघाडीत आहोत. आघाडी म्हणूनच लढणार असून आमचाच विजय निश्चित असल्याचे काँग्रेस नेत्या ॲड. खलिफे यांनी स्पष्ट केले.
राजापूर नगरपालिका निवडणुकीत आम्ही आघाडीच्या माध्यमातून निवडणूक लढविणार आणि सर्व जागा जिंकून पालिकेत आघाडीचा झेंडा फडकविणार असा आत्मविश्वास शिवसेना ठाकरे गटाचे राजापूर विधानसभा संपर्क प्रमुख ॲड. चंद्रप्रकाश नकाशे यांनी व्यक्त केला.

महाविकास आघाडीच्या वतीने पार पडलेल्या पत्रकार परिषदेत शिवसेना विधानसभा क्षेत्रप्रमुख चंद्रप्रकाश नकाशे, काँग्रेस तालुकाध्यक्ष जितेंद्र खामकर, शिवसेना तालुका प्रमुख कमलाकर कदम, शिवसेना नेते रामचंद्र सरवणकर, माजी नगराध्यक्ष ॲड. जमीर खलिफे, माजी काँग्रेस तालुकाध्यक्ष सुभाष बाकाळकर, अनिल कुडाळी, शहर प्रमुख संजय पवार, अभय मेळेकर, मनसेचे श्री. पवार, काँग्रेस शहराध्यक्ष अजीम जैतापकर आदी पदाधिकारी उपस्थित होते.