ठाकरे सेनेची थेट खासदार प्रणिती शिंदे यांची महाविकास आघाडीतून हकालपट्टी करण्याची मागणी.
विधानसभा निवडणुकीत उद्धव ठाकरे यांच्या शिवसेनेला २० तर काँग्रेसला १६ जागा मिळाल्या. शरद पवार यांची राष्ट्रवादी दहा जागांवर थांबली. त्यामुळे महाविकास आघाडीतील मतभेद समोर येऊ लागले आहे. आता सोलापूरमधील ठाकरे सेनेने थेट खासदार प्रणिती शिंदे यांची महाविकास आघाडीतून हकालपट्टी करण्याची मागणी केली आहे. अन्यथा आगामी निवडणुका स्वबळावर लढवू, असा इशारा दिला आहे.शिवसेना ठाकरे गटाचे उपनेते शरद कोळी यांनी खासदार प्रणिती शिंदे विरोधात आक्रमक भूमिका घेतली आहे. ते म्हणाले, खासदार प्रणिती शिंदे यांची हकालपट्टी केल्यानंतरच महाविकास आघाडी म्हणून एकत्र लढू.
अन्यथा सोलापूर जिल्ह्यातील आगामी महापालिका आणि जिल्हा परिषद निवडणुका स्वबळावर लढवू.खासदार प्रणिती शिंदे यांच्यामुळेच सोलापूर जिल्ह्यातील तीन विधानसभा जागेवर शिवसेना उबाठाचा पराभव झाला, असे शरद कोळी यांनी म्हटले आहे. प्रणिती शिंदे यांच्यासारखे गद्दार लोक महाविकास आघाडीत असतील तर एकत्र लढणे अवघड आहे. महाविकास आघाडीतून खासदार प्रणिती शिंदे यांची हकालपट्टी करा तसेच काँग्रेसने त्यांची खासदारकी रद्द करावी, असे त्यांनी म्हटले आहे.
