मांदिवली येथील मे. हनिफा हरन फजलानी या बॉक्साईट मायनिंगच्या प्रस्तावित प्रकल्पाबाबत स्थानिकांना विश्वासात घेतले जात नसल्याने विरोध वाढला

दापोली : मांदिवली येथील मे. हनिफा हरन फजलानी, मांदिवली बॉक्साईट भूखंड या बॉक्साईट मायनिंगच्या प्रस्तावित प्रकल्पाबाबत जनसुनावणी मागील महिन्यात मांदिवली येथे आयोजित करण्यात आली होती, ही महाराष्ट्र प्रदूषण नियंत्रण मंडळाची पर्यावरणविषयक जाहीर जनसुनावणी तूर्तास स्थगित करण्यात आली होती. कंपनी प्रशासनाने आपली कामाची भूमिका ही मांदिवली पंचक्रोशीतील ग्रामस्थांप्रती सर्वसमावेशक असायला हवी होती, अशी शक्यताही सुनावणी दरम्यान दिसली नाही. त्यामुळे प्रकल्प विरोधकांनी आंदोलनाचा पवित्रा घेत प्रकल्पाला विरोध केला आहे.
दरम्यान झालेल्या गदारोळाच्या कारणाने तूर्तास स्थगिती करण्यात आलेल्या सुनावणीनंतर अनेक प्रश्न उपस्थित होऊ लागले. एखाद्या उद्योग प्रकल्पाच्या निर्मितीत पर्यावरणाबाबतच्या नियमांचे पालन, परिसराचा सर्वांगीण विकास व स्थानिक भूमिपुत्रांसाठी रोजगार निर्मिती या काही मूलभूत बाबींचा विचार होणे गरजेचे आहे. उद्योग प्रकल्पाच्या एकूण प्रक्रियेत स्थानिक भूमिपुत्रांचा समावेशअसणे तितकेच महत्वाचे असल्याने प्रकल्पाला विरोध का होतोय याचा सारासार विचार कंपनी व्यवस्थापकांनी करायला पाहिजे होता. मात्र तसे होत नाही.
www.konkantoday.com