बदलापूरच्या शाळेत दोन चिमुकल्या मुलींवर झालेल्या लैंगिक अत्याचार प्रकरणातील आरोपी अक्षय शिंदेला कल्याण कोर्टाने सहा दिवसांची पोलिस कोठडी सुनावली
ठाणे जिल्ह्यातील बदलापूरच्या शाळेत दोन चिमुकल्या मुलींवर झालेल्या लैंगिक अत्याचार प्रकरणातील आरोपी अक्षय शिंदेला कल्याण कोर्टाने सहा दिवसांची पोलिस कोठडी सुनावली आहे.बदलापूर येथील आदर्श विद्या मंदिरात चार वर्षांच्या दोन मुलींवर झालेल्या अत्याचार प्रकरणावरून मंगळवारी (दि.२०) उद्रेक झाला. संबंधित आरोपीला आमच्या ताब्यात द्या, अशी मागणी करत पालक आणि आंदोलकांनी शाळा प्रशासनाविरोधात तीव्र संताप व्यक्त केला. त्यातच पोलिसांनी गुन्हा दाखल करण्यासाठी दिरंगाई केल्यामुळे संतापाचा कडेलोट झालेले पालक आणि आंदोलकांकडून शाळेत मोठ्या प्रमाणावर तोडफोड करण्यात आली. संतप्त जमाव बदलापूर रेल्वे ट्रॅकवर उतरला. आंदोलक आक्रमक झाल्याचे पाहून पोलिसांनी बचावासाठी लाठीचार्ज केला. तसेच अश्रूधुराची नळकांडी फोडण्यात आली. दरम्यान, शालेय मुलींवरील अत्याचाराच्या घटनेचा खटला फास्ट ट्रॅक कोर्टात चालवण्यात येईल, अशीघोषणा मुख्यमंत्री एकनाथ शिंदे व उपमुख्यमंत्री तथा गृहमंत्री देवेंद्र फडणवीस यांनी केली. तसेच खटल्यासाठी विशेष सरकारी वकील म्हणून ज्येष्ठ विधिज्ञ उज्ज्वल निकम यांची नियुक्ती करण्याचा निर्णय घेतल्याचेही फडणवीस यांनी सांगितले.
