चार्टर्ड अकाउंटेंट दिनाच्या निमित्ताने ३० जून रोजी दापोलीत सायकल फेरी…

दापोली :- आपल्या देशाच्या विकासात सीए खूप महत्त्वाची भूमिका बजावतात. चार्टर्ड अकाउंटेंट (सीए) दिन दरवर्षी १ जुलै रोजी साजरा केला जातो. यानिमित्ताने दापोली सायकलिंग क्लब तर्फे सीए मान्यवरांच्या सन्मानार्थ रविवार ३० जून २०२४ रोजी सायकल फेरीचे आयोजन करण्यात आले आहे. या सायकल फेरी दरम्यान दापोलीतील सीए मान्यवरांना भेटून त्यांचे आभार मानण्यात येतील.ही सायकल फेरी आझाद मैदान दापोली येथून सकाळी ७:३० वाजता सुरु होईल. ती केळस्कर नाका, बुरोंडी नाका, लाल कट्टा, नर्सरी रोड, आझाद मैदान अशी ५ किमीची असेल. सायकल फेरीचा समारोप आझाद मैदानात सकाळी ९:३० वाजता होईल. चार्टर्ड अकाउंटेंट ऑडिटिंग, टॅक्सेशन, आर्थिक आणि सामान्य व्यवस्थापनासह व्यवसाय आणि वित्त या सर्व क्षेत्रात काम करतात. देशातील सर्वात कठीण परीक्षांपैकी एक असलेली सीएची परीक्षा, आर्थिक क्षेत्रातील विविध धोरण, सुविधा, जीएसटी, वस्तू व सेवा कर इत्यादींबद्दल माहिती या सायकल फेरी दरम्यान जाणून घेण्यात येईल.या सायकल फेरीसाठी कोणतेही प्रवेश शुल्क नाही. सर्व वयोगटातील सायकल प्रेमी सहभागी होऊ शकतात. अधिक माहितीसाठी संपर्क नंबर ८६५५८७४४८६, ९०२८७४१५९५, ८७६७२८५८२७ हे आहेत. सायकल संस्कृती वाढावी व सायकल बद्दल आवड निर्माण व्हावी या हेतूने दापोली सायकलिंग क्लबतर्फे विनामूल्यपणे सायकल विषयक अनेक उपक्रम राबवले जातात. सर्वांनी यामध्ये सहकुटुंब, सहपरिवार सहभागी व्हा आणि आपल्या दैनंदिन जीवनात सायकलचा अधिक वापर करा असे आवाहन आयोजकांनी केले आहे.