आबलोली येथे मनसेच्या रक्तदान, नेत्र तपासणी व चष्मे वाटप शिबिराला उत्स्फूर्त प्रतिसाद
गुहागर तालुक्यातील आबलोली येथील आनंदवन बुद्ध विहार येथे महाराष्ट्र नवनिर्माण सेना (मनसे) तालुका गुहागरच्या वतीने गुहागर विधानसभा क्षेत्र संपर्क अध्यक्ष प्रमोद गांधी यांच्या ५३ व्या वाढदिवसानिमित्त पडवे जिल्हा परिषद गटात रक्तदान शिबिर, नेत्र तपासणी व मोफत चष्मे वाटप शिबिर उत्साहात झाले. या शिबिरात २३ रक्तदात्यांनी रक्तदान केले. तसेच नेत्र तपासणीसाठी ७० जणांना डोळ्यांच्या आजाराच्या विविध तपासण्या करून चष्मे वाटप करण्यात आले. तसेच महिलांची हिमोग्लोबिन तपासणी, रक्तगट तपासणी करण्यात आली.
भक्तश्रेष्ठ कमलाकर पंत लक्ष्मण वालावलकर रुग्णालय डेरवण यांच्या श्री स्वामी समर्थ ब्लड सेंटरमध्ये या रक्तबाटल्या संकलित करण्यात आल्या. रक्तदान शिबिरासाठी ब्लड सेंटरच्या डॉ. सुनीता झुंबरवाड, रवी अग्रवाल, नम्रता आयरे, विद्येश जांगळी, सचिन रानिम, धनश्री चव्हाण, सिद्धू लाड यांच्या टीमने विशेष मेहनत घेतली. नेत्र तपासणीसाठी माहीम (मुंबई) येथील सुरेंद्र ऑप्टिक्स टीमच्या वतीने डॉ. सुरेंद्र निकम, डॉ. दर्शना जाधव, डॉ. गौरव निकम, निर्मला माडीये, सचिन निकम, अजय डिंगणकर यांनी विशेष मेहनत घेतली.
या शिबिराला आबलोली ग्रामपंचायतीच्या सरपंच सौ. वैष्णवी नेटके, तंटामुक्ती अध्यक्ष आप्पा कदम, मनसेचे जिल्हा उपाध्यक्ष विनोद जानवळकर, तालुकाध्यक्ष सुनील हळदणकर, रवींद्र आंबेकर, प्रथमेश निमुणकर, अनिल जाधव यांच्यासह आबलोली पंचक्रोशीतील नागरिकांनी भेट देऊन मनसेच्या वतीने आयोजित या शिबिराबद्दल समाधान व्यक्त करून मनसेचे गुहागर तालुका संपर्क अध्यक्ष प्रमोद गांधी यांना वाढदिवसाच्या शुभेच्छा दिल्या.
या संपूर्ण शिबिराला जिल्हा परिषद पडवे गटातून उत्स्फूर्त प्रतिसाद मिळाला असून उपस्थित मान्यवरांच्या हस्ते रक्तदान केलेल्या रक्तदात्यांना प्रमाणपत्र वितरण तसेच मोफत चष्मा वाटप वितरण कार्यक्रमही उत्साहात संपन्न झाला.
