केक कापून, पेढे वाटून एसटीचा वर्धापनदिन साजरा!
रत्नागिरी : राज्य परिवहन महामंडळाच्या (एसटी) ७६ व्या वर्धापनदिनाचे औचित्य साधून रहाटागर एसटी बस स्थानकात प्रवासी व सर्व कर्मचाऱ्यांना पेढे वाटून शुभेच्छा देण्यात आल्या. या वेळी प्रवाशांच्या हस्ते केक कापण्यात आला. रत्नागिरीचे विभाग नियंत्रक प्रज्ञेश बोरसे, विभागीय यंत्र अभियंता श्री. मोहिते, आगार व्यवस्थापक संदीप पाटील, स्थानक प्रमुख श्रीमती प्रभुणे यांच्यासह चालक, वाहक आदी या वेळी उपस्थित होते.वर्धापन दिनानिमित्त रत्नागिरी विभागातील सर्व बसस्थानके रांगोळी काढून, फुला-पानांचे तोरणे बांधून सजविण्यात आली. रहाटागर बस स्थानकात प्रवाशांना विभाग नियंत्रक प्रज्ञेश बोरसे यांच्या हस्ते पेढे वाटण्यात आले. प्रवाशांना जास्तीत जास्त चांगल्या सुविधा देण्यासाठी कटिबद्ध असल्याचे सांगून सर्व प्रवासी वर्गाचे आभार आगार व्यवस्थापक संदीप पाटील यांनी मानले.
