भजन म्हणजे सूर, ताल आणि वाद्यांचा सुमेळ साधून प्राप्त केलेला परम आनंद किंवा ब्रह्मानंद होय. श्रीराम मंदिर कट्टाच्या भजनी मेळाव्यात बुवा प्रकाश वराडकर यांचे मार्गदर्शन, पुढील मेळावा १५ जून रोजी

रत्नागिरी (प्रतिनिधी) : भजन म्हणजे सूर, ताल आणि वाद्यांचा सुमेळ साधून प्राप्त केलेला परम आनंद किंवा ब्रह्मानंद होय. इश्र्वरापुढे लीन होऊन भजन रुपी भक्तिरसात न्हाऊन जात मन शुभ ऊर्जेने भारून घेत, अंतरात्म्याची प्रसन्नता मिळविणे आणि दुःखाचा विसर पडून आनंदाच्या डोही भक्तीचे आनंद तरंग निर्माण करणाऱ्या भजन कलेचे उपासक होणे हीच त्या विठ्ठल रुपी भगवंताला प्रेम भावे घातलेली साद होय आणि भक्तीची शक्ती होय, असे प्रतिपादन भजनी कलेचे मार्गदर्शक मार्गदर्शक बुवा प्रकाश वराडकर यांनी येथे केले. रत्नागिरीतील राम आळी येथील श्रीराम मंदिरात श्रीराम मंदिर ज्येष्ठ नागरिक कट्टाच्यावतीने तेरावा भजनी मेळावा शनिवार दिनांक १८ मे २०२४ रोजी दुपारी ३ ते सायंकाळी ५.३० वाजता या वेळेत झाला. हा मेळावा श्रीराम मंदिर ज्येष्ठ नागरिक कट्टा चे अध्यक्ष अण्णा लिमये यांच्या अध्यक्षतेखाली तसेच कट्टाचे सचिव श्री. सुरेंद्र घूडे यांच्या प्रमुख उपस्थितीत झाला. या मेळाव्यात भजनी मार्गदर्शक प्रकाश वराडकर यांनी मार्गदर्शन केले. बुवा वराडकर यांनी मार्गदर्शन केलेला हा सलग १० वा भजनी मेळावा होता. आजवर श्रीराम मंदिरात झालेल्या भजनी कलावंत मेळाव्यात श्री. वराडकर यांनी भजन कलेचा इतिहास, भजनाच्या पहिल्या आणि दुसऱ्या भागात नेमकी कोणती भजने म्हणावी. भजनात शिस्तबद्धता कशी असावी या बाबत मार्गदर्शन केले आहे. मार्च २०२४ मधील मेळाव्यात भजनी बुवा प्रकाश वराडकर यांनी भजनातील रूपाचा अभंग या काव्यप्रकाराबाबत शास्त्रोक्त मार्गदर्शन केले होते. तर या मेळाव्यात स्वरचित भक्तिगीते, भजन, गजर याबाबत मार्गदर्शन केले. आजच्या भजनी कलावंत मार्गदर्शन मेळाव्याची प्रस्तावना कट्टाचे अध्यक्ष सुरेश तथा अण्णा लिमये यांनी केली तर सचिव सुरेंद्र घुडे यांनी कट्टा च्या उपक्रमाबाबत माहिती दिली. या स्वरचित भक्तीगीत भजन मेळाव्यात अनेक भजनी कलावंतांनी आपली स्वरचित सुश्राव्य भजने, गजर, गवळण गीते सादर केली. त्यामध्ये बुवा सुरेंद्र घुङे, राजन भाटकर, शिवराम कदम, रमाकांत पांचाळ, ,निला गोंधळेकर, बालाजी घोसाळकर, दत्ताराम लिंगायत,रमेश गोवेकर, समीक्षा वालम, विश्वास शेंडे, संजय मेस्त्री, राजेंद्र सावंत, स्मिता साळवी, नंदकुमार बिर्जे यांचा समावेश होता. शेवटी भजन मार्गदर्शक बुवा प्रकाश वराडकर यांनी स्वरचित श्री देव सत्यनारायण यांच्यावरील गजर सादर केला आणि भजन मेळाव्याची सांगता झाली. यावेळी हार्मोनियम साथ सुरेंद्र घुडे यांनी दिली. मृदुंग साथ दत्ताराम लिंगायत, टाळ साथ रमाकांत पांचाळ, नंदकुमार बिर्जे, झांज साथ राजेंद्र साळवी यांनी दिली. शनिवार दिनांक 15 जून 2024 रोजी पुढील भजनी मार्गदर्शन मेळावा श्रीराम मंदिर येथे दुपारी ३ ते ५ वाजता या वेळेत होणार असून या मेळाव्याला विश्वनाथ भाटे बुवा हे मार्गदर्शन करणार आहेत. शेवटी श्रीराम मंदिर कट्टाचे सचिव सुरेंद्र घूडे यांनी श्रीराम मंदिर संस्था सेवेकरी सहभागी बुवा, साथीदार यांचे आभार मानले.