जिवंत असून देखील मतदार यादीत मृत दाखवल्याने खेडमधील महिलेचा मतदानाचा हक्क चुकला

7 मे रोजी, मंगळवारी राज्यासह देशात तिसर्‍या टप्प्यातील मतदान प्रक्रिया राबवण्यात आली. रत्नागिरी-सिंधुदुर्ग मतदारसंघातही तिसर्‍या टप्प्यात मतदान पार पडलं. मात्र, यामुळे सरकारी कामकाजातील घोळ पुन्हा एकदा समोर आला आहे.एका बाजूला जास्तीत जास्त मतदान होण्यासाठी शासनाकडून आवाहन केलं जातं आहे. मात्र मतदान करण्यासाठी आलेल्या एका महिलेला ती जीवंत असून देखील मतदार यादीमध्ये ती मृत असल्याची नोंद असल्याने त्या महिलेला मतदानाच्या हक्कापासून वंचित राहावं लागलं आहे. ही घटना रायगड लोकसभा मतदार संघात समाविष्ट असलेल्या दापोली विधानसभा मतदार संघातील खेड शहरातल्या एलपी इंग्लिश स्कूल येथील मतदान केंद्रावर घडली आहे, महिला जीवंत असून देखील मतदार यादीत तिचे नाव डिलीट झाल्याचा शिक्का मारण्यात आल्याचं निदर्शनास आल्यानंतर, त्या महिलेने मतदान केंद्रप्रमुखाशी विचारणा केली असता ही व्यक्ती मयत झाली असून मतदान करता येणार नाही असं सांगण्यात आले. मात्र त्या महिलेने तिथे ओळखपत्र आणि मतदार यादी क्रमांक सांगून ही व्यक्ती मीच आहे, असं पुराव्यानिशी निदर्शनास आणून दिलं. मात्र मतदार यादीत तुमचं नाव डिलीट असल्यामुळे तुम्हाला मतदान करता येणार नाही, असा शब्दात मतदानाच्या केंद्रप्रमुखांनी महिलेला सांगितलं. सावित्री लक्ष्मण बिर्जे असं या महिलेचं नाव असून 32 रायगड लोकसभा मतदार संघाच्या 263 दापोली विधानसभा मतदार संघातील मतदान केंद्र क्रमांक 257 खेड मधील मतदार क्रमांक 943 या मतदार यादीत त्यांचे मयत असल्याची नोंद आहे अखेरीस सावित्री बिरजे या मतदानापासून वंचित राहिल्या आहेत.www.konkantoday.com