नवजात अर्भकाचा गळा दाबून मृतदेह फेकला ताम्हिणी घाटात; खेड येथून चौघांना घेतले ताब्यात

रत्नागिरी : नवजात अर्भकाचा गळा दाबून खून करत त्याचा मृतदेह ताम्हिणी घाटात फेकून देण्यात आला होता. या प्रकरणी पोलिसांनी खेड येथून चौघांना ताब्यात घेतले आहे. अटक केलेल्या चार जणांना शनिवारी न्यायालयात हजर केले असता त्यांना सात दिवसांची पोलीस कोठडी सुनावण्यात आली आहे, असे पौड (जिल्हा पुणे) पोलीस ठाण्याचे निरीक्षक अशोक धुमाळ यांनी सांगितले.

नवजात बालकाच्या 27 वर्षीय आईने 11 फेब्रुवारी रोजी पोलिसांकडे धाव घेतली होती. त्यानुसार पोलिसांनी चौकशी सुरू केली. याप्रकरणी पुणे ग्रामीण हद्दीतील पौड पोलिस ठाण्यात एफआयआर दाखल करण्यात आला आहे. सध्या पुणे जिल्ह्यातील मुळशी तालुक्यात राहणाऱ्या या महिलेने रत्नागिरी जिल्ह्यातील 27 वर्षीय तरुणासोबतच्या संबंधातून 30 जानेवारी रोजी एका मुलाला जन्म दिला होता.
पोलीस तपासात आता असे समोर आले आहे की, 5 फेब्रुवारीच्या पहाटे तो माणूस, त्याचा भाऊ आणि आणखी दोन साथीदारांनी एका कारमध्ये ताम्हिणी घाटातील एका निर्जन भागात आई आणि बाळ या जोडीला जबरदस्तीने नेले. त्यांनी बाळाला सोबत घेतले आणि काही वेळाने त्याच्याशिवाय परतले. या महिलेने 11 फेब्रुवारी रोजी पुणे ग्रामीण पोलिसांशी संपर्क साधला. पौड पोलिस ठाण्यातील अनेक पथके तयार करण्यात आली आणि संशयित आणि नवजात बालकाचा शोध सुरू करण्यात आला.
तपास सुरू झाल्यानंतर अवघ्या काही तासांतच पोलिसांनी या चौघांना खेड तालुक्यातून अटक केली. संशयितांनी सांगितले आहे की त्यांनी बाळाचा गळा दाबून खून केला आणि त्याचा मृतदेह ताम्हिणी घाट परिसरात फेकून दिला.