रत्नागिरीत १ मे रोजी रंगणार अखंड घुंगुरनाद, ९ ते ६० वयोगटातील १५० नर्तक, नर्तिकांचा सहभाग

रत्नागिरी/प्रतिनिधी

येथील रास नृत्यालयाच्या वतीने अखंड घुंगुरनाद या १२ तासांच्या कथ्थक, ओडिसी, भरतनाट्यम आणि कुचिपुडी या नृत्याविष्काराचा अनोखा कार्यक्रम आयोजित केला आहे. ९ ते ६० वयोगटातील १५० नर्तिका व नर्तक यामध्ये सहभाग घेणार आहेत. इथल्या कलाकारांना बाहेर जाऊन नृत्य सादरीकरणाबाबत योग्य मार्गदर्शन मिळण्यासाठी या कार्यक्रमाचा उपयोग होणार आहे, अशी माहिती रास नृत्यालयाच्या संचालिका श्रुती आठल्ये यांनी पत्रकार परिषदेत दिली.

या कार्यक्रमाबाबत अधिक माहिती देताना श्रुती आठल्ये यांनी सांगितले,की कोरोना महामारीमुळे दोन वर्षे हा कार्यक्रम होऊ शकला नाही. यापूर्वी एकदा रत्नागिरीकरांनी घुंगुरनाद कार्यक्रमाचा आस्वाद घेतला आहे. यंदा कुचिपुडी नृत्याचाही समावेश करण्यात आला आहे.
भारतीय शास्त्रीय नृत्याचे आठ प्रकार आहे. यापैकी कथ्थक आणि भरतनाट्यमचे क्लास रत्नागिरी शहर आणि जिल्ह्यात सुरू आहेत. अन्य प्रकार इथल्या कलाकारांना माहिती व्हावेत, त्यांना मार्गदर्शन मिळावे या हेतूने अखंड घुंगुरनाद कार्यक्रम महत्त्वाचा ठरणार आहे.
कोलकाता येथील नृत्यगुरु तपाश देबनाथ हेसुद्धा यामध्ये सादरीकरण करणार आहेत. सकाळी १० ते रात्री १० या वेळेत हा कार्यक्रम विनामूल्य पाहता येणार आहे. प्रत्येक तासादिड तासाला वेगवेगळे कलाकार सादरीकरण करतील. या वेळी घुंगुरांचा नाद थांबणार नाही. यासाठी दर अर्ध्या तासाला विद्यार्थीनींची नियुक्ती करण्यात आली आहे.

सौ. आठल्ये यांनी सांगितले की, गुरुवारपासून (ता. २८) ३० एप्रिलपर्यंत कथ्थक नृत्य कार्यशाळा आयोजित केली आहे. कार्यशाळेत आंतरराष्ट्रीय ख्यातीचे नृत्य गुरु कोलकाता येथील तपाश देबनाथ मार्गदर्शन करणार आहेत. रत्नागिरीतील नृत्य कलाकारांसाठी ही आगळी वेगळी पर्वणी आहे. रत्नागिरीसह जिल्ह्यातून आणि पुणे, कणकवली, मालवण, कोल्हापूर, कऱ्हाड येथूनही कलाकार शिबिरात सहभागी होणार आहेत. झाडगाव, शेरे नाका येथील रत्नागिरी कऱ्हाडे ब्राह्मण संघाच्या राणी लक्ष्मीबाई सभागृहात तीन दिवशी सकाळी ९ ते सायंकाळी ६ या वेळेत शिबिर होणार आहे.
www.konkantoday.com