दापोली तालुक्यात वळणे-निगडे फाटा येथे बस-कार अपघात, दोघांना दुखापत
दापोली तालुक्यातील वळणे निगडे फाटा येथे बस व कार यांच्या झालेल्या अपघातात बसमधील दोघेजण जखमी झाल्याची घटना सोमवारी दुपारी ३.३० वाजण्याच्या सुमारास घडली.
दापोली बस आगाराचे चालक अंकुश ठाणगे हे आपल्या ताब्यातील बस घेवून दाभोळ कडून दापोलीकडे येत होते. त्या वेळेला कार घेवून दापोलीमधून नितीन जाधव, प्रदीप गमरे व सुशांत जाधव हे गुहागरकडे जाण्यासाठी निघाले होते. ते वळणे निगडे फाटा येथे आले असता समोरून भरधाव वेगाने येणार्या बसने कारच्या चालकाच्या बाजूला जोरदार धडक दिली. यामध्ये कारचे मोठ्या प्रमाणात नुकसान झालेले आहे. कारमधील कोणालाही दुखापत झालेली नाही. बसमधून प्रवास करणार्या प्रवाशांपैकी रजिया पटेल (५०) व सुशील येलवे (३५) यांना किरकोळ दुखापत झाली. त्यांना उपचाराकरिता उपजिल्हा रूग्णालय दापोली येथे दाखल करण्यात आले. उपचारादरम्यान त्यांना घरी सोडण्यात आले. दापोली पोलीस स्थानकात अपघाताची नोंद करण्याचे काम उशीरापर्यंत सुरू होते.
