एमएचटी सीईटीचा निकाल १६ जून रोजी, सीईटी कक्षाकडून सहा अभ्यासक्रमांच्या निकालांच्या तारखा जाहीर !
मुंबई : शैक्षणिक वर्ष २०२५-२६ मध्ये विविध व्यावसायिक पदवी व पदव्युत्तर पदवी अभ्यासक्रमांच्या प्रवेशासाठी राज्य सामाईक प्रवेश परीक्षा कक्षाकडून घेण्यात आलेल्या प्रवेश परीक्षांपैकी सहा परीक्षांच्या निकालाची अंदाजित तारीख जाहीर करण्यात आली आहे. त्यानुसार ४ ते १७ जूनदरम्यान सहा अभ्यासक्रमांचे निकाल जाहीर करण्यात येणार आहेत. त्यात एमएचटी सीईटीचा निकाल १६ जून रोजी जाहीर होणार आहे.
राज्य सामाईक प्रवेश परीक्षा कक्षाकडून घेण्यात आलेल्या प्रवेश परीक्षांसंदर्भातील काही परीक्षांचे निकाल जाहीर करण्यात आले आहेत. मात्र यातील महत्त्वाची असलेल्या एमएचटी सीईटी परीक्षेच्या पीसीएम व पीसीबी गटाचा निकाल १६ जून रोजी जाहीर करण्यात येणार आहे. त्याचप्रमाणे बी.बीसीए/बीबीए/बीएमएस/बीबीएम आणि विधी पाच वर्षे अभ्यासक्रमाचा निकाल ४ जून रोजी जाहीर करण्यात येणार आहे. त्याचप्रमाणे बी. डिझाईन अभ्यासक्रमाचा निकाल ९ जून रोजी आणि विधी तीन वर्षे अभ्यासक्रमाचा निकाल १७ जून रोजी जाहीर करण्यात येणार असल्याचे राज्य सामाईक प्रवेश परीक्षा कक्षाकडून सांगण्यात आले आहे.
