संजय कदम यांनी खेडच्या तीनबत्ती नाक्यात भगवा झेंडा व बाळासाहेबांचे बॅनर फाडले होते हे शिवसेना पक्षप्रमुख उद्धव ठाकरे विसरले का? : आमदार योगेश कदम

खेड : संजय कदम यांनी खेडच्या तीनबत्ती नाक्यात भगवा झेंडा व बाळासाहेबांचे बॅनर फाडले होते. हे शिवसेना पक्षप्रमुख उद्धव ठाकरे विसरले का? असा सवाल दापोलीचे आमदार योगेश कदम यांनी केला आहे. शनिवारी दि.21 रोजी माध्यम प्रतिनिधींशी ते बोलत होते.
राष्ट्रवादीचे माजी आमदार संजय कदम यांनी शुक्रवारी शिवसेनेत प्रवेश निश्चित असल्याचे जाहीर करतानाच शिवसेना नेते रामदास कदम व आ. योगेश कदम यांच्यावर टीका केली होती. त्या टीकेला आ. योगेश कदम यांनी उत्तर दिले आहे. ते म्हणाले, वंदनीय बाळासाहेबांचा लाडका मतदारसंघ हा दापोली मतदारसंघ आहे. संजय कदम हे 2013 मध्ये ज्यावेळी शिवसेना सोडून राष्ट्रवादीत गेले त्यावेळी त्यांनी भगवा जाळला होता. त्यावेळेला वंदनीय बाळासाहेबांचे बॅनर त्यांनी जाळले होते. अशा व्यक्तीला उद्धव ठाकरे पक्षात घेण्यास तयार होतात. संजय कदमसारखी व्यक्ती जेव्हा वारंवार पक्षांतर करते तेव्हा त्या व्यक्तीची समाजातील विश्वासार्हता संपते, असेही आ. कदम म्हणाले.