लांजातील देवधे फाटा येथे इलेक्ट्रॉनिक्स दुकानाला आग

लांजा : तालुक्यातील मुंबई-गोवा महामार्गावरील देवधे फाटा येथील रोहित इलेक्ट्रॉनिक्स दुकानाला सोमवारी पहाटे भीषण आग लागली. प्राथमिक अंदाजानुसार शॉर्ट सर्किट होऊन अचानक आग लागल्याने या आगीत संपूर्ण दुकान जळून खाक झाले असून यात कोणत्याही प्रकारची जीवित हानी झालेली नाही. मात्र दुकानाचे मोठे नुकसान झाले आहे. देवधे फाटा येथील रोहित रवींद्र कांबळे यांच्या रोहित इलेक्ट्रॉनिक्स या दुकानाला आग लागल्याचे सकाळी 6 वाजण्याच्या दरम्यान ग्रामस्थांच्या निदर्शनास आले.या घटनेत दुकानाला लागलेल्या आगीत संपूर्ण दुकान जळून खाक झाले होते. त्या ठिकाणी असलेल्या ग्रामस्थांकडून आग आटोक्यात आणण्याचे काम सुरू होते.  सुमारे 7 लाखांचे नुकसान झाल्याचे त्यांनी प्राथमिक अंदाजात सांगितले.