शृंगारतळी येथे गादी कारखान्याला आग
गुहागर : शृंगारतळीमधील गणेशनगर येथे गादी कारखान्याला गुरुवारी सकाळी १० वाजण्याच्या सुमारास आग लागली. या आगीत विरेंद्र चौघुले यांच्या गादी कारखान्याचे लाखो रूपयांचे नुकसान झाले आहे. मात्र यामध्ये कोणत्याही प्रकारची जीवितहानी झालेली नाही. आगीचे कारण समजलेले नसल्याची माहिती पोलिसांनी दिली आहे.
सकाळी अचानक या गादी कारखान्याला आग लागल्याने परिसरात धावपळ उडाली. आगीने रौद्ररूप धारण केल्याने विरेंद्र चौघुले यांचे राहते घर आणि गादी कारखान्याचे सुमारे १० ते १२ लाखांचे नुकसान झाल्याची शक्यता व्यक्त केली जात आहे. तहसीलदार प्रतिभा वराळे यांनी तत्काळ घटनास्थळी भेट दिली. तातडीने अग्निशमन दलाला पाचारण करत, आग आटोक्यात आणण्यात आल्याची माहिती गुहागर पोलिसांनी दिली.
