रेल्वेतून पडल्याने तरुणाचा मृत्यू

लांजा : रेल्वेतून पडल्याने तरुणाचा जागीच मृत्यू झाला. ही घटना कोकण रेल्वे मार्गावरील आंजणारी बोगद्यानजीक शनिवारी 29 ऑक्टोबर रोजी सकाळी 8 वाजता घडली. या तरुणाची अद्यापही ओळख पटलेली नाही.
याबाबत पोलिसांनी दिलेल्या माहितीनुसार, आंजणारी बोगद्यानजीक रूळाच्या बाजूला या तरुणाचा मृतदेह आढळून आला आहे. रेल्वेतून खाली पडल्याने त्याचा जागीच मृत्यू झाला. या घटनेची खबर आंजणारी गावाच्या पोलिस पाटील श्रध्दा सरपोतदार यांनी लांजा पोलिसांना दिली. त्यानंतर पोलिस घटनास्थळी दाखल झाले. याबाबत कोणाला माहिती असल्यास त्यांनी लांजा पोलिस ठाण्याशी संपर्क साधावा, असे आवाहन लांजा पोलिसांकडून करण्यात आले आहे.
आकस्मिक मृत्यूची नोंद लांजा पोलिस ठाण्यात करण्यात आली आहे. याचा अधिक तपास पोलिस हेड कॉन्स्टेबल व्ही. जी. चावरे हे करत आहेत.