राजापुरात वीज कोसळून बैलाचा मृत्यू

राजापूर : परतीच्या पावसाचा जोरदार तडाखा तालुक्याला बसला आहे. तालुक्यात वीज पडण्याच्या दोन घटना घडल्या. यामध्ये सोमवारी खडीकोळवण येथे वीज कोसळून तेथील ग्रामस्थ राजाराम सीताराम गुरव यांचा सुमारे सात ते आठ वर्षाचा व वीस हजार रुपये किमतीचा बैल जागीच गतप्राण झाल्याची घटना घडली.
गेले काही दिवस परतीच्या पावसाबरोबर वीजा कोसळण्याच्या घटना तालुक्यात घडल्या आहेत. त्यामध्ये रायपाटण परीसरात दोन विद्युत ट्रासफॉर्मर वीज कोसळून जळून खाक झाले होते तर एका घरावर वीज कोसळून आतील साहित्य जळाले होते . मोसम येथही एका घरावर वीज कोसळुन नुकसान झाले होते. शिवाय एका महिलेला देखील विजेचा सौम्य धक्का बसला होता. त्यानंतर खडीकोळवण येथे वीज पडून एक बैल मृत्यूमुखी पडल्याची घटना सोमवारी घडली आहे. या घटनेत विजेचा दणका एवढा प्रचंड होता की, बैल जागीच गतप्राण झाला होता. तालुका पशुधन विभागाने घटनास्थळी जाऊन पाहाणी केली.