गवा रेड्याने शेतकऱ्याच्या पोटात घुसवले शिंग, माचाळ येथील शेतकरी गंभीर

लांजा : माचाळ येथे एका शेतकऱ्यावर रविवारी दुपारी ३ च्या सुमारास गवा रेड्याने हल्ला केला. यात शेतकरी गंभीर जखमी झाला आहे. या हल्ल्यात शेतकऱ्याच्या पोटातील आतडे बाहेर आले आहे. त्याला उपचाराकरिता रत्नागिरी शासकीय रुग्णालयात हलविण्यात आले आहे. भिकाजी राघव मांडवकर (वय 65, रा. माचाळ) असे या शेतकऱ्याचे नाव आहे. ते आपल्या शेतात दुपारच्या सुमारास काम करीत असताना ही घटना घडली. त्यावेळी अचानक त्या ठिकाणी गवारेडा त्यांच्यासमोर आला. गवा रेड्याने त्यांच्यावर हल्ला केला. आजूबाजूला असलेल्या शेतकऱ्यांनी त्याला हटविण्यासाठी प्रयत्न केला. मात्र तोपर्यंत गवारेड्याने भिकाजी मांडवकर यांच्या पोटात शिंगे खुपसून गंभीर जखमी केले. काही वेळानंतर गवारेडा जंगलात पसार झाला. ही घटना कळताच लांजा वनविभाग तसेच स्थानिक लोकांनी ॲम्बुलन्सची व्यवस्था केली. त्यांना तत्काळ उपचाराकरिता शिपोशी येथे आणण्यात आले. त्यानंतर पुढील उपचाराकरिता जिल्हा रुग्णालयात दाखल करण्यात आले.