चिपळुणात कॉलेज तरुणांच्या दोन गटात राडा

चिपळूण : शहरातील एका प्रसिद्ध महाविद्यालयाच्या आवारात विद्यार्थ्यांच्या दोन गटामध्ये जोरदार राडा झाला. मंगळवारी दुपारी तीन वाजण्याच्या सुमारास ही घटना घडली. दोन्ही बाजूने पंधरा-वीस विद्यार्थी एकमेकांच्या अंगावर धावून आले. दगड, विटादेखील उचलण्यात आल्या. या घटनेची महाविद्यालयाच्या आवारात माहिती मिळताच महाविद्यालयातून शेकडो मुले रस्त्यावर आली. यामुळे मोठा गलका निर्माण झाला. पोलिसांना याची खबर मिळताच पोलिस घटनास्थळी दाखल झाले. यानंतर हे प्रकरण शांत झाले. मात्र, या प्रकरणाची महाविद्यालयाच्या आवारात जोरदार चर्चा सुरू
होती.  या मागचे नेमके कारण मात्र समजू शकले नाही. पोलिसांत हे प्रकरण दाखल झालेले नाही. मात्र, पोलिस येताच विद्यार्थी पांगल्याने वातावरण निवळले.