मॉर्निंग वॉकला जाताना सावधान! रत्नागिरी जिल्हा परिषदेसमोर कारची धडक बसून वृद्धाचा मृत्यू

रत्नागिरी : मॉर्निंग वॉक करणार्‍यांनो सावधान! रत्नागिरी शहरात पहाटे चालण्यासाठी बाहेर पडलेल्या वृध्दाचा कारने धडक दिल्यामुळे मृत्यू झाला आहे. ही घटना सोमवार 12 सप्टेंबर रोजी पहाटे 5.30 वा. सुमारास जिल्हा परिषद समोरील रस्त्याच्या चढावात घडली. अनिल रघुनाथ नलावडे (वय 65, रा. शिवसमृध्दी अपार्टमेंट जेल रोड, रत्नागिरी) हे पहाटे जिल्हा परिषदेच्या समोरील चढावातून चालत जात होते. यावेळी (एमएच-04-एचएक्स-2101) ही कार घेऊन कारचालक नजबुल कमलदराज खान (वय 32, रा. उद्यमनगर, रत्नागिरी) हा जात होता. या चढावात आला असता त्याचा कारवरील ताबा सुटला. त्याच्या कारने चालणार्‍या नलावडे यांना धडक दिली. या धडकेत ते गंभीर जखमी झाल्याने त्यांना अधिक उपचारांसाठी जिल्हा शासकीय रुग्णालयात दाखल करण्यात आले. यावेळी उपचार सुरू असताना त्यांचा मृत्यू झाला. याची नोंद शहर पोलिस ठाण्यात करण्यात आली आहे.