गुहागर-आरे येथे दोन एसटी बसची समोरासमोर धडक; दोन चालकांसह 41 प्रवासी जखमी

गुहागर : दोन एसटी बसेसची समोरासमोर धडक होऊन  झालेल्या अपघातात दोन चालकांसह 41 प्रवासी जखमी झाले. यातील 19 जखमींवर ग्रामीण रुग्णालयात अधिक उपचार सुरू आहेत. एका गंभीर असलेल्या महिलेस जिल्हा शासकीय रुग्णालयात हलविण्यात आले असून एसटी आगाराकडून अपघातग्रस्तांना पाचशे रूपयांची रोख मदत देण्यात आली. तालुक्यातील आरे नागदेवाडी येथे सोमवारी (दि.12) सकाळी 9.25 च्या सुमारास ही घटना घडली. आरे नागदेवाडी येथे रानवीच्या दिशेने जाणार्‍या शृंगारतळी अंजनवेल या एसटीला शृंगारतळीकडे जाणार्‍या धोपावे चिपळूण या एसटीने धडक दिली. धोपावे-चिपळूण ही बस संतोष उकार्डे चालवत होते. या गाडीत 32 प्रवासी होते. शृंगारतळी-अंजनवेल ही बस चालक डी. एल. भोसले चालवत होते. या गाडीत 12 प्रवासी होते.  सकाळी 9.25 च्या सुमारास पाऊस पडत असताना उकार्डे यांनी उतारावर असलेल्या वळणावर आपली बस चुकीच्या बाजूला नेली. त्याचवेळी रानवीकडे जाणार्‍या बसला धडक बसली. या धडकेमध्ये दोन्ही बसमधील प्रवासी समोरच्या सीटवर आदळले. त्यामुळे सर्व प्रवाशांच्या नाक व तोंडाला दुखापत झाली. आरजीपीपीएलच्या रुग्णवाहिका अपघातस्थळी दाखल झाल्या.  अपघातात जखमी झालेल्या 22 पैकी 21 रुग्णांना उपचार करून घरी सोडण्यात आले तर 45 वर्षीय सुहासिनी सैतवडेकर यांच्या उलट्या थांबत नसल्याने त्यांना जिल्हा शासकीय रुग्णालयात पाठविले असल्याचे डॉ. बळवंत यांनी सांगितले. या अपघातात जखमींमध्ये, कैलास तुकाराम नायनाक (50, पालशेत), प्रसाद महादेव वायंगणकर (32, दाभोळ), साहील पालकर (18, पालपेणे), सुनंदा गावणकर (80, रानवी), शकुंतला शिगवण (75, रानवी), महमंद बामणे (70, दाभोळ), अश्फाक कुपे (49, शृंगारतळी), अनिल मोहित (45, कोथरुड), विलास साळवी (45, मार्गताम्हाने), प्रगती भेकरे (50, रानवी), पार्वती चोगले (75, रानवी), पद्मजा तांडेल (77, वेलदूर), योगिता वणकर (25, नवानगर), कोमल पवार (18, वेलदूर), नम्रता पवार (45, घरटवाडी), प्रांजली भोरजी (19, धोपावे), प्रज्ञेश पाष्टे (18, खामशेत), आसावरी कदम (41, वेलदूर), संतोष उकार्डे (53, आबलोली), अथर्व यादव (16, पालपेणे), आदेश वाड्ये (38, अंजनवेल), श्रेया बागकर (15, अंजनवेल), सानिका भुवड (17, पवारसाखरी), सानिका शितप (17 पवारसाखरी), चंदना दणदणे (16 पवारसाखरी), समिक्षा पवार (16, पवारसाखरी), सानिका झगडे (16 पवारसाखरी), साहिल भुवड (17, पवारसाखरी), सुहासिनी सैतवडेकर (45, अंजनवेल),  सायली डांगे (41, अंजनवेल), सुगंधा कदम (80, वेलदूर), आकांक्षा राठोड (19, आगरवायंगणी), आयुष पवार (20, घरटवाडी), प्रतिक भावे (16, खामशेत), मधुकर पारधी (73 धामणदेवी), शंकुतला सैतवडेकर (65, अंजनवेल), सायली सैतवडेकर (10, अंजनवेल) यांचा समावेश आहे.