कोळंबे भरणकरवाडी येथे तरुणाला मारहाण

संगमेश्वर : तालुक्यातील कोळंबे भरणकरवाडी येथे दारूच्या नशेत दोघांनी तरुणाला मारहाण केल्याची घटना 27 ऑगस्ट रोजी रात्री 10.15 वाजण्याच्या सुमारास घडली. या प्रकरणी दोघांविरोधात संगमेश्वर पोलिस ठाण्यात गुन्हा दाखल करण्यात आला आहे.
सचिन कमलाकर पडवळ (वय 34), प्रदीप कमलाकर पडवळ (वय 36, दोघे राहणार भरणकरवाडी, संगमेश्वर) अशी गुन्हा दाखल करण्यात आलेल्या दोघांची नावे आहेत. याबाबतची फिर्याद सूचित लिंगायत (वय 31, कोळंबे भरणकरवाडी) यांनी संगमेश्वर पोलिस ठाण्यात दिली.
पोलिसांनी दिलेल्या माहितीनुसार फिर्यादी सूचित लिंगायत आणि सचिन पडवळ, प्रदीप पडवळ हे एकाच वाडीत राहणारे आहेत. सचिन आणि प्रदीप या दोघांनी दारू पिऊन येऊन सूचित लिंगायत यांच्याकडे रागाने बघत शिवीगाळ केली. यावेळी सूचित याने मला शिवीगाळ का करता? अशी विचारणा केल्याने राग मनात भरून सचिन पडवळ याने हातातील काठीने डोक्यात मारून करत ठार मारण्याची धमकी दिली. त्यानंतर प्रदीप पडवळ याने हाताच्या थापटाने मारहाण करून शिवीगाळ केली. यामध्ये सुचित लिंगायत हे जखमी झाले. त्यांनी पोलिस स्थानकात दिलेल्या तक्रारीनुसार सचिन आणि प्रदीप यांच्यावर गुन्हा दाखल करण्यात आला आहे.