प्रभानवल्ली येथे भर वस्तीत घुसून बिबट्याचा गोठ्यातील वासरावर हल्ला
लांजा : तालुक्यातील प्रभानवल्ली येथे भर वस्तीत घुसून बिबट्याने गोठ्यातील वासरावर हल्ला करून ठार मारल्याची घटना घडली आहे. यामध्ये गंभीर वासराचा अखेर मृत्यू झाला. ही घटना शुक्रवारी १ जुलै रोजी रात्री उशिरा घडली आहे. बिबट्याच्या या भर वस्तीतील हल्ल्याने ग्रामस्थांमध्ये भीतीचे वातावरण आहे.
लांजातील येरडववाडी येथेही काही दिवसांपूर्वी बिबट्याने येथे मानवी वस्तीमध्ये शिरून येथील शेळ्या-मेंढ्या फस्त केल्या होत्या. त्यानंतर आता शुक्रवारी 1 जुलै रोजी रात्रीच्या सुमारास प्रभानवल्ली घोणसेवाडीतील रामचंद्र लक्ष्मण बावदाने यांच्या गोठ्यात शिरून बिबट्याने वासरु उचलून नेले. त्याच्या हल्ल्यात वासराचा मृत्यू झाला. सकाळी हा प्रकार मालक बावदाने यांच्या लक्षात आल्यानंतर त्यांनी ग्रामस्थांना याची माहिती दिली. बिबट्याचा मुक्त संचारामुळे ग्रामस्थ भयभीत झाले आहेत. बिबट्याला जेरबंद करण्याची मागणी येथील सामाजिक कार्यकर्ते बबन साडविलकर यांनी केली आहे.
