साडवली कासारवाडी येथे बिबट्या आढळला जखमी अवस्थेत

संगमेश्वर : तालुक्यातील साडवली कासारवाडी येथे नर जातीचा बिबट्या जखमी अवस्थेत आढळल्याची माहिती प्राप्त झाल्यानंतर वन विभागामार्फत पशुवैद्य अधिकाऱ्यांकडून त्याच्यावर उपचार करण्यात आले आहेत.

याबाबत वन विभागाकडून मिळालेली सविस्तर माहिती अशी की, आज (१७ सप्टेंबर) सकाळी साडेनऊ वाजण्याच्या सुमारास मौजे साडवली कासारवाडी (ता. संगमेश्वर) येथील राजेंद्र धने यांच्या राहत्या घराच्या मागील बाजूला असलेल्या भागात बिबट्या अडकला असल्याची माहिती साडवलीचे पोलीस पाटील यांनी वन विभागास दिली.

त्यानंतर लागलीच वन विभागाच्या कर्मचाऱ्यांनी साहित्यासह जागेवर जाऊन खात्री केली असता बिबट्या एका जागेवर एकाच ठिकाणी बसल्याचे दिसून आले. त्याला सुरक्षितरित्या ताब्यात घेऊन त्याची पशुवैद्यकीय दवाखाना (श्रेणी एक) सहाय्यक आयुक्त युवराज शेटे व कोल्हापूर वन विभागाचे वन्यजीव पशुवैद्यक संतोष वाळवेकर यांच्याकडून वैद्यकीय तपासणी करून घेतली. हा बिबट्या नर जातीचा असून सुमारे तीन ते चार वयाचा आहे. त्याच्या मागील डाव्या पायाच्या मांडीला जखम असून पशुवैद्यकीय अधिकाऱ्यांनी त्याच्यावर उपचार केले.
यावेळी घटनास्थळी सहायक वनसंरक्षक रत्नागिरी चिपळूण श्रीमती प्रियंका लगड, परिक्षेत्र वन अधिकारी (रत्नागिरी) प्रकाश सुतार, रत्नागिरी- चिपळूण फिरते पथकाचे परिक्षेत्र वन अधिकारी जितेंद्र गुजले, वनपाल (संगमेश्वर, देवरुख) सागर गोसावी, वनपाल (लांजा) सारिक फकीर, वनरक्षक (फुणगूस) आकाश कडूकर, वनरक्षक (साखरपा) सहयोग कराडे , वनरक्षक (दाभोळे) श्रीमती सुप्रिया काळे, वनरक्षक (आरवली) सुरज तेली, वनरक्षक (लांजा) श्रीमती नमिता कांबळे, वनरक्षक (कोरले) श्रीमती श्रावणी पवार, वनरक्षक (राजापूर) फिरते पथक विशाल पाटील, वनरक्षक फिरते पथक दत्तात्रय सुर्वे, वनरक्षक वन तपासणी नाका (साखरपा) रणजीत पाटील, पोलीस पाटील साडवली व ग्रामस्थ उपस्थित होते.
ही कार्यवाही विभागीय वन अधिकारी रत्नागिरी-चिपळूण श्रीमती गिरीजा देसाई तसेच सहाय्यक वनसंरक्षक रत्नागिरी-चिपळूण श्रीमती प्रियंका लगड यांच्या मार्गदर्शनाखाली करण्यात आली आहे. अशा प्रकारच्या घटना घडल्यास किंवा वन्यप्राणी अडचणीत सापडल्यास वनविभागाचा टोल फ्री क्रमांक 1926 किंवा 9421 741335 या क्रमांकावर संपर्क साधण्याचे आवाहन वन विभागाच्या वतीने विभागीय वन अधिकारी श्रीमती गिरीजा देसाई यांनी केले आहे.