बांधकामावर मारलेले पाणी घरात घुसल्याच्या रागातून परटवणे येथे मारहाण

रत्नागिरी : घराच्या बांधकामावर मारलेले पाणी घरात घुसले आणि घराची रिप कापल्याचा जाब विचारला, या रागातून शेजार्‍याला 4 जणांनी लाकडी रिप आणि सळईने मारहाण करून त्याच्या घरावर दगडफेक करत नुकसान केले. ही घटना रविवार 29 मे रोजी दुपारी 2.30 वा. सरोदेवाडी परटवणे येथे घडली. राहुल शिवगण, आकाश रसाळ, रितेश देसाई, पंकज रसाळ (सर्व रा. परटवणे, रत्नागिरी) अशी गुन्हा दाखल करण्यात आलेल्या 4 संशयितांची नावे आहेत. त्यांच्या विरोधात अमर अनंत शिवगण (27, रा. परटवणे, रत्नागिरी) यांनी  तक्रार दिली आहे. त्यानुसार राहुल शिवगणने आपल्या घराच्या बांधकामावर पाणी मारले. ते भिंतीवाटे अमर शिवगणच्या घरात गेले. तसेच राहुलने अमरच्या घराची रिपही कापली होती. याबाबत अमरने राहुलला जाब विचारला. या रागातून संशयितांनी संगनमताने अमरला लाकडी रीप आणि सळईने मारहाण करून त्याच्या घरावर दगडफेक केली. याचा अधिक तपास शहर पोलिस करत आहेत.