खेडमध्ये जगबुडी नदीला आलेल्या भरतीत बुडाला टेम्पो

खेड : येथील जगबुडी नदीला आलेल्या भरतीच्या पाण्यामध्ये  शहरालगत नदीपात्रात उतरलेला एक मालवाहू टेम्पो बुडाला. ही घटना शुक्रवारी दि. 21 रोजी सायंकाळी घडली. मच्छी मार्केटसमोर उथळ नदी पात्रात सायंकाळी एका टेम्पो चालकाने टेम्पो उतरवला होता. भरतीचे पाणी चढू लागल्याने टेम्पो बाहेर काढण्याचा प्रयत्न केला. परंतु टेम्पोचे चाक रुतल्याने टेम्पो पाण्यामध्ये बुडू लागला. चालकाने प्रसंगावधान राखून आपला जीव वाचवण्यासाठी नदीच्या पाण्यातून बाहेर जाणे पसंत केले. काही वेळातच भरतीचे पाणी इतके वाढले की हा टेम्पो अर्ध्याहून अधिक भरतीच्या पाण्याखाली बुडाला होता. रात्री उशिरापर्यंत हा टेम्पो काढण्यासाठी स्थानिक नागरिकांचे प्रयत्न सुरू होते. येथे अनेक वाहनचालक आपल्या गाड्या धुण्यासाठी जातात. अनेकवेळा भरती आणि ओहोटीच्या वेळा लक्षात न आल्यामुळे अशा प्रकारच्या घटना घडल्या आहेत.