मासेमारीचा ‘खांद्याचा धंदा’ करण्यासाठी केरळमधील मच्छीमार दापोलीत दाखल

दापोली : हर्णै बंदरात मोठ्या 6 सिलेंडर 4 सिलिंडर नौकांप्रमाणेच छोट्या नौकाही मासेमारी करतात. मात्र, मागील 5 वर्षांपासून या मच्छीमारांनी आपली मासेमारी पद्धत बदलली आहे. यासाठी येथील मच्छीमारांनी केरळच्या कुशल मच्छमारांची मदत घेतली आहे. हे मच्छीमार हजारो गळ लावलेले जाळे समुद्रात टाकून सुरमई मासेमारीचा धंदा करतात. याला खांद्याचा धंदा बोलले जाते. केरळमध्ये हा प्रकार जोरात चालतो. त्यामुळे तेथील कुशल मच्छीमारांना येथे बोलावले जाते. मच्छीमार पगारावर राहत नाहीत. ते भागीदारीवर या व्यवसायात उतरतात. बोट मालक आणि खलाशी यांच्यात नफ्याच्या वाटणीबाबत तोंडी करार होतो. या धंद्यासाठी बर्‍याच वेळा नौकाही केरळमधूनच आणल्या जातात. छोट्या बोटींनी 8 तासाच्या केल्या जाणार्‍या मासेमारीसाठी केरळचे 100 पेक्षा जास्त कुशल मच्छीमार हे हर्णै बंदरात दाखल झाले आहेत. त्यामुळे हर्णै बंदरात छोट्या नौकाधारकांची लगबग सुरू असून हर्णै बंदरात आता सुरमई मासेमारीला वेग येणार आहे. साधारण 7 ते 8 तासातच नौका किनार्‍याला येत असल्यामुळे ही मासळी खूपच ताजी असते. त्यामुळे या मासळीला तुलनेने जास्त दर मिळतो. मोठ्या नौकांमध्ये मोठी गुंतवणूक आणि 6 ते 8 दिवसांचा खर्च करून ही अपेक्षित उत्पन्न मिळत नसल्यामुळे येथील मच्छीमार डबघाईला आले आहेत. डिझेलच्या किमतीने शंभरी गाठल्यामुळे तर हर्णैतील मोठ्या नौका समुद्रात जाण्याची रिस्क घेण्याच्या मनस्थितीत नाहीत. त्यामुळे येथील तरुण वर्ग छोट्या धंद्याकडे वळू लागले आहेत.त्यातून त्यांना फायदा होत असल्याचे चित्र आहे.
www.konkantoday.com