राजापूर शहरात चार मोकाट गुरांचा मृत्यू

राजापूर : शहरातील राजीव गांधी क्रीडांगणावर सोमवारी चार मोकाट गुरांचा मृत्यू झाल्याने खळबळ उडाली आहे. नगर परिषद प्रशासनाने तातडीने या गुरांची विल्हेवाट लावली आहे. अन्न पदार्थातील विषबाधेमुळे या जनावरांचा मृत्यू झाला असून या प्रकरणी चौकशी करण्याची मागणी भाजपाचे तालुकाध्यक्ष अभिजित गुरव यांनी केली आहे.
या मृत जनावरांचे शवविच्छेदन करून त्याची विल्हेवाट लावणे आवश्यक असताना नगर परिषदेने घाईगडबडीत या मृत जनावरांची विल्हेवाट लावल्याचा आरोप गुरव यांनी केला आहे. याप्रकरणी आपण जिल्हाधिकार्‍यांकडे तक्रार करणार असल्याचे गुरव यांनी पत्रकारांना सांगितले.
क्रीडांगणावर दूषित अन्न व अन्य प्लास्टिक वस्तू खाल्ल्याने या गुरांचा मृत्यू झाला असून नगर परिषद प्रशासन सत्य लपवत असल्याचा आरोप गुरव यांनी केला आहे. एकाच वेळी मृत्यू पावलेल्या चारही मृत जनावरांचे शवविच्छेदन करून त्यांचा मृत्यू नेमका कशामुळे झाला, याची खातरजमा नगर परिषदेने करणे आवश्यक होते. मात्र तसे न करता अत्यंत घाईघाईने या गुरांची विल्हेवाट लावण्याचे कारण काय? असा सवाल गुरव यांनी व्यक्त केला आहे.