चिपळुणात अपघातात पाचजण गंभीर जखमी

चिपळूण : कारने मोटारसायकल आणि रिक्षाला जोरदार धडक दिल्याने तिहेरी अपघात घडला आहे. मुंबई-गोवा महामार्गावर सवतसडा धबधब्याच्या अलिकडे झालेल्या या अपघातात पाचजण गंभीर जखमी झाले आहेत. मंगळवारी रात्री 11:30 वाजण्याच्या सुमारास महामार्गावर पेढे शितपवाडी येथे अपघात झाला. या प्रकरणी कारचालकावर गुन्हा दाखल करण्यात आला. या अपघातामध्ये सुभाष यशवंत जाधव, सुधीर गोविंद धाडवे (50), सुवर्णा सुधीर धाडवे (45), रोशनी जनार्दन धाडवे (22), गायत्री गणेश जोगळे (31) जखमी झाले आहेत. याबाबत संकेत सुधीर धाडवे (रा. परशुराम) यांनी पोलिसांत खबर दिली. संकेत हा आपल्या ताब्यातील मोटारसायकल तसेच भाड्याने केलेली रिक्षा घेऊन महामार्गावरून परशुराम येथे जात होते. ते पेढे शितपवाडी येथे आले असता समोरून येणार्‍या भरधाव कारने रिक्षासह दुचाकीला जोरदार धडक दिली.