खेड पोलीस स्थानकाला कोरोनाचा विळखा १४ पोलीस पॉझिटिव्ह असल्याने खळबळ

खेड : कोरोना महामारीत दिवस-रात्र स्स्त्यावर उतरून काम करणाऱ्या खेड़ पोलिसच सध्या कोरोनाची शिकार ठरत असल्याने खळबळ उडाली आहे. खेड पोलीस स्थानकात कर्तव्य बजावणारे १४ पोलीस सध्या कोरोनाबाधीत असल्याने खेड पोलीस स्थानकाला कोरोनाचा विळखा पडल्याचे स्पष्ट झाले आहे. ही संख्या आणखी वाढण्याची शक्यता असल्याने गणेशोत्सवादरम्यान कायदा व सुव्यवस्था कशी राखायची हा प्रश्न खेड पोलिस प्रशासनासमोर आहे.
राज्यात लॉकडाऊन सुरु झाल्यापासून पोलीस प्रशासन रस्त्यावर उतरून काम करत आहेत. खेड तालुका हे जिल्हाचे प्रवेशद्वार असल्याने जिल्ह्यात येणाऱ्या प्रवाशांना रोखण्याची फार मोठी जबाबदारी सुरवातीपासूनच खेड पोलिसांवर आहे. लॉकडाऊनच्या काळात कशेडी, तुळशी फाटा, भरणे नाका, महाडनाका येथे दिवसरात्र बंदोबस्त करणारे पोलीस सध्या कशेडी येथील चेकपोस्ट वर रात्रंदिवस कर्तव्य बजावत आहेत. या दरम्यान मुंबई, पुणे यासारख्या कोरोना हॉटस्पॉट मधून जिल्ह्यात येणाऱ्या प्रत्येकाशी त्यांचा संपर्क येत आहे. गेले काही महिने पोलिसांना हक्काची आठवड्याची रजाही घेता आलेली नाही.
कोरोनाचा फैलाव होवू नये यासाठी लॉकडाऊनच्या काळात लोक जेव्हा घरामध्ये बसून होते त्यावेळी पोलीस दिवसरात्र रस्त्यावर उतरून आपले कर्तव्य बजावत होते. सर्वसामान्यांच्या आरोग्याची चिंता करता करता पोलीस आपल्या आरोग्याची चिंता करणे विसरूनच गेले होते. मात्र आता याच पोलिसांना महाभयंकर कोरोनाने गाठले असल्याने गणेशोत्सवादरम्यान कायदा आणि सुव्यवस्था राखताना खेड पोलिस प्रशासनाला तारेवरची कसरत करावी लागणार आहे.
खेड पोलीस स्थानकात आधीच पोलिसांची कमरतता आहे. त्यामुळे भौगोलिकदृष्ट्या उभ्या- आडव्या पसरलेल्या तालुक्यात कायदा आणि सुव्यवस्था राखताना पोलीस प्रशासनाच्या नाकी नऊ येत आहेत त्यातच गणेशोत्सवासारख्या सणांदरम्यान १४ पोलिस कोरोनाचे शिकार झाले असल्याने कायदा आणि सुव्यवस्था कशी राखायची हा प्रश्न येथील प्रशासनाला पडला आहे.
www.konkantoday.com