सतिश तांबडकर याने असे लग्न करून समाजासमोर ठेवला वेगळा आदर्श

प्रत्येकाच्या जीवनात विवाह हा महत्वाचा घटक असतो. विवाह म्हणजेच जीवनाचा एक महत्वाचा टप्पाच होय. आपला शुभ-विवाह होण्यापूर्वी पासूनच प्रत्येकजण हा सोहोळा थाटामाटात करण्याची स्वप्न बघत असतो. मात्र समाजातील काहीजण असे असतात की त्यांनी दाखवलेल्या कृतीमुळे समाजासमोर एक नवा नवा आदर्श निर्माण होतो. चिपळूण तालुक्यातील मुर्तवडे (देणवाडी) येथील भूमिपूत्र सतीश शांताराम तांबडकर यांच्या धाडसी आणि क्रांतीकारी निर्णयाने पुढे आला आहे.
नव विवाहित सतिश तांबडकर यांचा मोठा बंधू स्व. सुरेश तांबडकर पंचक्रोशीत पांड्या नावाने परिचित होता. काही वर्षापूर्वी त्यांचे दुचाकी अपघातात निधन झाले. या क्षणी त्यांचा नुकताच विवाह होवून एक वर्षे झाले होते आणि महिना ही पूर्ण न झालेले गोंडळ बाळ त्यांच्या पदरी होतं. पण काळाने घात केला आणि कुटुंबातील कर्ताकरविता सुरेश निघून जाण्याने कुटुंंबावर दुःखाचा डोंगर कोसळला. गुहागर तालुक्यातील आबलोली शहरात सुरेश फोटोग्राफीचा व्यवसाय करत असे. आपला नवरा सोडून गेल्याने त्यांच्या पत्नीने आजवर त्या बाळाचे संगोपन करत त्याच घरी आपला जीवनप्रवास सुरु ठेवला.
आता सुरेश यांचा लहान बंधू लग्न करण्यासाठी सज्ज होताना त्यांच्या मनी विचार आला की, आपण लग्न करताना एखादी दुसरी मुलगी घरी आणणे त्यापेक्षा ज्या वहिनीने इतके दिवस आमचा सांभाळ केला, तिला सोबतच लग्नगाठ बांधून तिच्या आयुष्यात आनंद देण्याचा निर्णय घेतला. या निर्णयाला अगदी घरच्यांनी पाठिंबा देत, समाज काय बोलेल याकडे दुर्लक्ष करत नव्या संसाराची सुरूवात केली. नुकताच त्यांचा शुभविवाह दि. २२ जुलै २०२१ रोजी सावर्डे येथील श्री स्वामी समर्थ मंगल कार्यालय येथे पार पडला.
www.konkantoday.com