![](https://konkantoday.com/wp-content/uploads/2021/06/img_4850.jpg)
श्री क्षेत्र गणपतीपुळे येथील हॉटेल व्यवसाय सुरू व्हावे यासाठी मुख्यमंत्री व पर्यटन मंत्र्यांना निवेदन देण्यात येणार
राज्य शासनाने घातलेल्या निर्बंधांमुळे अनेक ठिकाणी हॉटेल व्यावसायिक अडचणीत आले आहेत शासनाने अजून राज्यातील देवस्थाने बंद ठेवली आहेत मात्र तरीदेखील अनेक पर्यटनस्थळी पर्यटक येत आहेत रत्नागिरीजवळील प्रसिध्द गणपतीपुळे येथेदेखील आता काही प्रमाणात पर्यटकांचा ओघ सुरू झाला आहे
रत्नागिरी तालुक्यातील श्री क्षेत्र गणपतीपुळे येथील लॉजिंग, हॉटेल व इतर व्यवसाय सुरू करण्यासाठी हॉटेल व्यवस्थापन संघटना, ग्रामपंचायत सदस्य व हाॅटेल असोसिएशन यांच्यामध्ये चर्चा करण्यात आली. या चर्चेमध्ये गणपतीपुळेत येणारे पर्यटक बंदमुळे माघारी फिरत असल्याने लवकरच हाॅटेल व्यवसाय सुरू करण्याबाबत निर्णय घेण्यात आला.
गणपतीपुळे येथील पर्यटन व्यवसाय गेल्या अनेक महिन्यांपासून बंद आहे. गणपतीपुळे मंदिर बंद असल्यामुळे परिसरातील पर्यटन व्यावसायिकांचे कंबरडे मोडले आहे. गेल्या दीड वर्षापासून येथील पर्यटनाला खीळ बसली आहे. तसेच पर्यटनावर अवलंबून असलेले छोटे-मोठे व्यवसाय व कर्मचाऱ्यांवर उपासमारीची वेळ आली आहे.याबाबत रत्नागिरीचे जिल्हाधिकारी, मुख्यमंत्री उद्धव ठाकरे, पर्यटन मंत्री आदित्य ठाकरे, पालकमंत्री अनिल परब, उच्च व तंत्रशिक्षण मंत्री उदय सामंत यांना निवेदन देण्याचा निर्णय घेण्यात आला. हा व्यवसाय सुरू करताना कोरोनाच्या अनुषंगाने नियमांचे काटेकोर पालन करण्याचे ठरविण्यात आले एकीकडे शासनाकडून खाजगी व्यावसायिकांना बंदी घालण्यात आली तरी एमटीडीसीने अनेक ठिकाणी पर्यटकांना आपली निवासस्थाने खुली करून दिली आहेत
www.konkatoday.com