ठाकरे बंधूंची पुन्हा भेट, राज यांच्या भेटीसाठी उद्धव ठाकरे शिवतीर्थवर
ठाकरे बंधूंच्या युतीची चर्चा गेल्या अनेक दिवसांपासून सुरू असतानाच शिवसेना ठाकरे गटाचे पक्षप्रमुख उद्धव ठाकरे हे आज मनसेप्रमुख राज ठाकरे यांच्या भेटीसाठी शिवतीर्थवर दाखल झाले आहेत.त्यांच्या सोबत संजय राऊत अनिल परब हेही उपस्थित असल्याची माहिती समोर आली आहे. गणेशोत्सवादरम्यान ठाकरे बंधूंची भेट झाली होती, त्यानंतर आज पुन्हा शिवतीर्थ या राज ठाकरेंच्या निवासस्थानी राज व उद्धव यांची भेट होत आहे.
ठाकरे बंधूंची ही भेट अचानक नसून पूर्वनियोजित बैठक होती. दोन दिवसांपूर्वीच आजची बैठक ठरली होती अशी माहिती सूत्रांकडून मिळत आहे. आगामी महापालिका निवडणुका आणि स्वराज्य संस्थांच्या निवडणुकांच्या पार्श्वभूमीवर ही बैठक अत्यंत महत्वाची असून त्या अनुषंगाने या बैठकीत चर्चा होणार असल्याचे समजते. राजकीयदृष्ट्या ही भेट महत्वाची मानली जात आहे.
