१६ कोटींपैकी एकही पैसा जमा झाला असेल तर राजीनामा देईन -आ. राजन साळवी

लांजा नगर पंचायतीला १६ कोटी रूपये मंजूर झाल्याचे जे मोठमोठे बोर्ड लावले होते. त्या १६ कोटींपैकी एक पैसा जरी लांजा नगर पंचायतीच्या खात्यात जमा झाला असेल तर मी आमदारकीचा राजीनामा देईन, असे  खुले आव्हान आमदार राजन साळवी यांनी शिवसेना (शिंदे) गटाचे नगराध्यक्ष मनोहर बाईत आणि विरोधकांना दिले.
लांजा-राजापूर विधानसभा मतदार संघाचे शिवसेना (ठाकरे) गटाचे  आमदार राजन साळवी यांनी मंगळवारी शहरातील शिवसेना (ठाकरे) गट पक्ष कार्यालयात पत्रकार परिषद घेतली. यावेळी बोलताना आमदार साळवी यांनी सांगितले की, ज्या लांजावासियांनी विश्‍वास टाकून शिवसेनेच्या हाती सत्ता दिली होती मात्र शिवसेना पक्ष फुटीनंतर नगराध्यक्ष व काही नगरसेवक शिवसेना (शिंदे) गटात गेले. त्यानंतर पालकमंत्र्यांच्या माध्यमातून लांजा नगर पंचायतीला १६ कोटींचा निधी मंजूर झाल्याचे बोर्ड लांजा नगर पंचायत हद्दीतील प्रत्येक प्रभागात लावण्यात आले होते. मात्र या १६ कोटींपैकी एकही पैसा लांजा नगर पंचायतीच्या खात्यावर जमा झालेला नाही. उलट आपण शहरातील विविध विकासकामांसाठी ९ कोटी १५ लाखांचा निधी आणला. मात्र नगराध्यक्ष व नगरसेवक हे असलेले पैसे खर्च करू शकत नाहीत. ही शोकांतिका आहे. उलट १६ कोटी आल्याचे सांगून श्रेय घेण्याचा मात्र प्रयत्न ते करत आहेत. जी कामे मंजूर आहेत ते बदलण्याचे पाप नगराध्यक्ष करत आहेत. त्यामुळे त्यांनी आपल्या पदाचा राजीनामा दिला पाहिजे. तरीही त्यांनी राजीनामा दिला नाहीच तर आगामी निवडणुकीत लांजाची जनताच नगराध्यक्ष व त्यांच्या समर्थक नगरसेवकांना निवडणुकीत त्यांची जागा दाखवेल, असा ठाम विश्‍वास यावेळी आमदार राजन साळवी यांनी व्यक्त केला.

www.konkantoday.com