आरे वारे येथील अपघात प्रकरणी दुचाकीस्वारावर गुन्हा दाखल

रत्नागिरी :  आरे-वारे येथे रस्त्याच्या विरुद्ध दिशेने भरधाव दुचाकी चालवून दुसर्‍या दुचाकीला धडक दिली.यात तिघांना दुखापत झाली असून दोन्ही वाहनांचे नुकसान झाले आहे.  सोमवार 26 डिसेंबर रोजी दुपारी 1.30 वा. ही घटना घडली असून ग्रामीण पोलीस ठाण्यात गुन्हा दाखल करण्यात आला आहे. प्रितेश प्रकाश सुर्वे (वय 32, नेवरे, रत्नागिरी ) याच्यावर गुन्हा दाखल करण्यात आला आहे. सोमवारी दुपारी तो  दुचाकी (एमएच-08-एवाय-9180) रस्त्याच्या विरुद्ध दिशेने घेऊन जात होता. त्याचवेळी नरेंद्र कृष्णा घवाळी (रा. उंडी, जयगड ) हा आपल्या ताब्यातील ज्युपिटर (एमएच-08-एवाय-5057) वरून ओंकार प्रदीप भाटकर (रा. बसणी नागझरी, रत्नागिरी ) याला सोबत घेऊन समोरून येत होता. तेव्हा प्रितेश सुर्वेने त्यांच्या दुचाकीला धडक देत हा अपघात केला. याबाबत अधिक तपास ग्रामीण पोलीस करत आहेत.