मंडणगड, दापोलीसाठी नवीन पाणी योजना : ना. उदय सामंत

दापोलीतील म्हाडाच्या जागेत १६० घरे बांधणार

दापोली : दापोली व मंडणगड या दोन्ही शहरांसाठी नवीन पाणी पुरवठा योजना राबविण्यासाठी निधीची गरज असून दापोलीसाठी ५० कोटी तर मंडणगडसाठी ३० कोटी रुपयांची आवश्यकता आहे. नगरविकास मंत्री एकनाथ शिंदे यांच्याशी चर्चा करून लवकरात लवकर दोन्ही नगरपंचायतीना राज्य नगरोत्थान निधीमधून निधी उपलब्ध करू दिला जाईल, अशी माहिती राज्याचे उच्च व तंत्रशिक्षण मंत्री उदय सामंत यांनी दिली. दापोली नगरपंचायत येथे दि.१९ रोजी घेण्यात आलेल्या पत्रकार परिषदेत त्यांनी ही माहिती दिली. यावेळी बोलताना सांगितले की, दापोली शहरात नाट्यगृहासाठी विकास आराखड्यात जागा मंजूर असून तेथे नाट्यगृह न करता मल्टीपर्पज हॉल जसा आम्ही वेंगुर्ला (जि. सिंधुदुर्ग) येथे केला आहे, तसा करावा यासाठी एक आराखडाही तयार करावा, असा पर्याय आपण सूचविला आहे.
दापोली येथे असलेल्या म्हाडाच्या जागेत १६० घरे उभारण्यात येणार असून त्यातील १०० घरे ही अत्यल्प उत्पन्न गटासाठी तर ६० घरे ही अल्प उत्पन्न गटासाठी असणार आहेत. त्यासाठी १८ कोटी रुपये मंजूर झाले असून त्या घरांचा दर लवकरच म्हाडा जाहीर करेल, अशी माहितीही ना. सामंत यांनी दिली.