दापोली येथे १०० खाटांच्या रुग्णालयाला मंजूरी मिळावी -आमदार योगेश कदम यांचे मुख्यमंत्र्यांना निवेदन

खेड :भौगोलिक दृष्ट्या अतिशय दुर्गम असलेल्या दापोली तालुक्यासाठी दापोली उपजिल्हा रुग्णालय येथे १०० खाटांचे रुग्णालय मंजूर व्हावे अशी मागणी दापोली मतदार संघाचे आमदार योगेश कदम यांनी राज्याचे मुख्यमंत्री उद्धव ठाकरे यांच्याकडे एका निवेदनाद्वारे केली आहे.
आमदार योगेश कदम यांनी मुख्यमंत्री ठाकरे यांना दिलेल्या निवेदनात म्हटले आहे की, दापोली हा भौगोलिकदृष्ट्या अतिशय दुर्गम तालुका आहे. या तालुक्यात आवश्यक त्या शासकिय आरोग्य सुविधा हव्या त्या प्रमाणात उपलब्ध नसल्याने तालुक्यातील सर्वसामान्य रुग्णांना उपचारांसाठी चिपळूण, रत्नागिरी, पुणे किंवा मुंबई यासारख्या मोठ्या शहरांमध्ये जावे लागते किंवा महागड्या खासगी रुग्णालयात दाखल व्हावे लागते. आरोग्याच्या गंभीर तक्रारी असलेल्या रुग्णाला उपचारांसाठी चिपळूण, रत्नागिरी, मुंबई किंवा पुणे या ठिकाणी हलवायचे झाल्यास वेळ आणि पैशाचा अपव्यय होतो. लांबच्या प्रवासामुळे वैद्यकिय उपचार मिळण्यास विलंब होत असल्याने रुग्णाच्या जीवावर बेतण्याचीही शक्यता नाकारता येत नाही. वेळेत उपचार न मिळाल्यानेमुळे रुग्ण दगावल्याच्या काही घटनाही घडलेल्या आहेत. दापोलीतील खासगी रुग्णालयात दाखल करायचे झाल्यास होणारा खर्च सर्वसामान्यांना परवडणारा नाही.
या पार्श्वभुमीवर दापोली येथील उपजिल्हा रुग्णालय येथे १०० खाटांचे सुसज्य रुग्णालय व्हावे अशी या तालुक्यातील जनतेची मागणी आहे. तसा प्रस्ताव आरोग्य संचालक ठाणे, यांच्याकडे पाठविण्यात आला असून तो प्रलंबीत आहे. येथील जनतेच्या आरोग्याच्या दृष्टीने दापोलीत १०० खाटांचे सुसज्य रुग्णालय होणे ही काळाची गरज असल्याने या रुग्णालयाला आवश्यक त्या निधीसह मंजूरी द्यावी अशी मागणी दापोली मतदार संघाचे आमदार योगेश कदम यांनी मुख्यमंत्र्यांकडे केली आहे.
www.konkantoday.com