चिपळूण शहरातील एका भागात कबड्डी मैदानात रंगला मारामारीचा सामना.

चिपळूण शहरातील एका भागात आयोजित जिल्हास्तरीय कबड्डी स्पर्धेच्या अंतिम सामन्यात दोन संघात मारामारी झाली. त्यामुळे एकच खळबळ उडाली असून येथे लावण्यात आलेल्या सीसीटीव्ही कॅमेर्‍याचे नुकसान झाल्याने आयोजकांनी दोन्ही संघांना बक्षिसे न देता रिकाम्या हाताने माघारी पाठवले.याबाबत मिळालेल्या माहितीनुसार तीन दिवस या भव्य स्पर्धा सुरू होत्या. दोन दिवसांपूर्वी या स्पर्धेचे दोन उपांत्य व त्यानंतर अंतिम सामना होता. अंतिम सामना तालुक्यातील कबड्डीसाठी प्रसिद्ध असलेल्या भागातील दोन संघांमध्ये झाला.

शेवटच्या क्षणी विजय ठरवणार्‍या गुणावरून मैदानातच या दोन संघांमध्ये वाद सुरू झाला. पंचानी एका संघाला विजयी घोषित केल्यानंतर त्यांनी व त्यांच्या समर्थकांनी एकच जल्लोष केला. ते नाचत नाचत मैदानात आल्यावर दुसर्‍या संघाच्या एकाला धक्का लागला. यातून वादाला सुरूवात झाली. शिवीगाळीपर्यंत असणारा हा वाद बघता बघता इतका विकोपाला गेला अन दोन्ही संघांमध्ये तुफान मारामारी झाली. कोणीही ऐकण्यास तयार नव्हते. याची माहिती पोलिसांना मिळाल्यानंतर त्यांनी तेथे जावून हा वाद मिटवला.www.konkantoday.com