पशुसंवर्धन विभागाच्या योजनांचा लाभ घेण्याचे आवाहन

जिल्ह्यातील बेरोजगारांसह पशुपालक व शेतकरी बांधवांना स्वयंरोजगाराचे साधन उपलब्ध व्हावे म्हणून पशुसंवर्धन विभागामार्फत वैयक्तिक लाभाच्या योजना राबविल्या जातात. या जिल्हास्तरीय योजनांसाठी संगणक प्रणाली लागू केली आहे. त्यासाठी १८ डिसेंबरपर्यंत ऑनलाईन अर्ज मागविण्यात आले आहेत. पशुपालकांनी डेअरी, पोल्ट्री किंवा शेळीपालन या बाबींसाठी अर्ज करण्याचे आवाहन जिल्हा पशुसंवर्धन विभागातर्फे करण्यात येत आहे.

नाविण्यपूर्ण राज्यस्तरीय व जिल्हास्तरीय योजनेंतर्गत दुधाळ गाई-म्हशींचे गट वाटप करणे, शेळी-मेंढी गट वाटप करणे, एक हजार मांसल कुक्कुट पक्ष्यांच्या संगोपनासाठी निवारा शेड उभारणीस अर्थसहाय्य देणे, १०० कुक्कुट पिलांचे वाटप व २५ + ३ तलंगा गट वाटप या योजनांसाठी ऑनलाईन पद्धतीने लाभार्थी निवड प्रक्रिया राबविली जाणार आहे. विविध योजना व उपक्रमांच्या माध्यमातून ग्रामीण भागातील पशुपालक, शेतकरी बांधवांना पशुसंवर्धन विभागाच्या वतीने वैयक्तिक लाभाच्या योजनांतर्गत प्रक्रिया अधिक पारदर्शक करण्यासाठी राज्यस्तरीय नाविण्यपूर्ण योजनेमध्ये गेली तीन वर्षे ऑनलाईन पद्धतीने अर्ज मागविणे व लाभार्थी निवड करण्याची पध्दत सुरु करण्यात आली आहे. जिल्हास्तरीय विविध योजनांसाठी संगणक प्रणाली लागू करण्यात येत आहे. यामध्ये एखाद्या योजनेकरिता अर्ज केल्यानंतर त्यास दरवर्षी पुन्हा अर्ज करावे लागू नये, यासाठी तयार केलेली प्रतिक्षायादी पुढील 5 वर्षापर्यंत लागू ठेवण्याची सोय केली आहे. यामुळे अर्ज केलेल्या पशुपालकांना लाभ मिळण्याची शक्यता वाढली आहे. त्यांना प्रतीक्षा यादीतील क्रमांकानुसार अंदाजे केव्हा लाभ मिळेल, हे कळू शकल्यामुळे लाभार्थी हिस्सा भरणे किंवा इतर बाबींकरिता नियोजन करता येणे शक्य होणार आहे. ऑनलाईन अर्ज हीं
https://ah.mahabms.com या संकेतस्थळावर सादर करता येणार आहेत. या योजनांसाठी फक्त ऑनलाईन पद्धतीनेच अर्ज स्विकारले जाणार आहेत. अर्ज भरणे अत्यंत सुलभ करण्यात आले आहे. अधिक माहितीसाठी टोल फ्री क्रमांकावर तसेच तालुक्याचे पशुधन विकास अधिकारी ( विस्तार), पंचायत समिती, जिल्हा पशुसंवर्धन अधिकारी अथवा जिल्हा पशुसंवर्धन उपआयुक्त कार्यालय, तालुका लघु पशुवैद्यकीय सर्वचिकित्सालय अथवा जवळच्या पशुवैद्यकीय केंद्रावर संपर्क साधावा असे आवाहन पशुसंवर्धन विभागाने केले आहे.
www.konkantoday.com