चिपळूण नगर परिषद निवडणुकीसाठी ४८ मतदान केंद्रांवर मतदान

चिपळूण नगर परिषद निवडणुकीसाठी शहरात ४८ केंद्रे राहणार आहेत. यातील एकही केंद्र संबेदनशील नसल्याची माहिती निवडणूक निर्णय अधिकारी तथा प्रांताधिकारी आकाश लिगाडे यांनी शुक्रवारी पत्रकार परिषदेत दिली. निवडणुकीसाठी यंत्रणा सज्ज झाली असून ५३ पथके या प्रक्रियेत भाग घेणार आहेत. ५ ठिकाणी तपासणी नाके राहणार असून सर्वांनी मतदान प्रक्रिया व मतमोजणीवेळी प्रशासनाला सहकार्य करण्याचे आवाहन त्यांनी केले.
निवडणूक व मतमोजणीबाबत माहिती देताना ते म्हणाले की, १४ प्रभागातील २८ नगरसेवक व नगराध्यक्षपदासाठी ही निवडणूक होत आहे. यासाठी २१,५९६ महिला व २०,९८६ पुरुष असे एकूण ४२,५८२ मतदार मतदान करणार आहेत. यासाठी ४८ मतदान केंद्र राहणार असून त्यासाठी २७ इमारतींची दुरुस्ती करण्यात आली आहे. काही इमारतींची डागडुजी सुरू आहे. सखी व आदर्श अशी दोन मतदान केंद्रही राहणार आहेत. या प्रक्रियेसाठी ७झोनल अधिकारी नियुक्त करण्यात आले असून एकूण ५३ पथके काम करणार आहेत. त्यांना १६ व २३ नोव्हेंबर रोजी याबाबतचे प्रशिक्षण दिले जाणार आहे. निवडणुकीत नगराध्यक्षपदाच्या उमेदवारांना ११ लाख २५ हजार तर नगरसेवकांना ३ लाख ५० हजार इतका खर्च करता येणार आहे. त्याची तपशिलवार माहिती त्यांना द्यावी लागणार आहे. निवडणुकीदरम्यान कोणताही अनुचित प्रकार घडून आचारसंहितेचा भंग होऊ नये, तसेच आपल्या शहराला गालबोट लागू नये, यासाठी कापसाळ, कळंबस्ते, गुहागर बायपास, खेर्डी, गांधारेश्वर अशा ५ ठिकाणी तपासणी नाके राहणार आहेत. येथे वाहने व संशयितांची कसून चौकशी केली जाणार आहे.
मतदानासाठी ५३ मशिन तयार करण्यात येणार असून उमेदवारांची संख्या वाढल्यास मशिन वाढणार आहेत. निवडणूक व मतमोजणीची सर्व प्रक्रिया गुरुदक्षिणा सभागृहातून होणार असून येथे ३ डिसेंबर रोजी मतमोजणीसाठी १५ टेबल राहणार आहेत. त्यामुळे सकाळी १० वा. सुरू होणारी मतमोजणीची प्रक्रिया ३ तासात पूर्ण होणार आहे. सभागृहाबाहेर विविध पक्षांच्या कार्यकर्त्यांना उभे राहण्यासाठी जागा ठरवून दिल्या जाणार असल्याचे लिगाडे यांनी सांगितले.
www.konkantoday.com