कोकणच्या सिया सावंतने खेलो इंडियात पटकावले सुवर्णपदक

रत्नागिरी : मूळची कोकणवासीय आणि सध्या नवी मुंबईत वास्तव्य करणार्‍या सिया अभिजित सावंतने खेलो इंडिया युथ गेम्स 2022 मधील 100 मीटर रिलेमध्ये सुवर्णपदक पटकावले. रत्नागिरीतील माळनाका येथील दीपक देसाई यांची सिया नात लागते. तिचे मूळ गाव कणकवली तालुक्यात आहेत. रत्नागिरीत आलेल्या सियावर तिच्या नातेवाईकांनी शुभेच्छांचा वर्षाव केला. सिया अगदी लहान वयात मैदानावर प्रशिक्षण घेण्यास जाऊ लागली. सहा वर्षांची असताना राज्य स्पर्धेत तिने पहिले पदक पटकावले. मैदानी स्पर्धांच्या चित्रफिती पाहत असतानाच तिला शंभर, दोनशे मीटर धावण्याची आवड निर्माण झाली. मुळातच नैसर्गिकरित्या तिच्याकडे धावण्यासाठीची क्षमता होती. फक्त तिला आवश्यक होती ती मार्गदर्शनाची. रवी बागडी यांनी उत्कृष्ट प्रशिक्षकाची भूमिका पार पाडली. त्यामुळे तिने आंतर-शालेय, आंतर-जिल्हा आणि राज्य स्तरावर अनेक चॅम्पियनशिप जिंकण्यासह, राष्ट्रीयस्तरावर धडक मारली. सिंथेंटिक मैदान चर्चगेटला असल्यामुळे आई-वडील तिला गोरेगावरून चर्चगेटला सरावासाठी नेत होते. त्यानंतर बांद्रा येथे खासगी मैदान बनले आणि त्यांचा प्रवास कमी झाला. सकाळी आणि सायंकाळी प्रत्येकी दोन तासाचा नियमित सराव हेच तिच्या यशाचे रहस्य आहे, असे सिया आवर्जून सांगते. त्यामुळेच हरियाणा येथे नुकत्याच झालेल्या खेलो इंडिया युथ गेम्स 2022 मध्ये 100 मीटर रिलेमध्ये सुवर्णपदक पटकावले. या स्पर्धेतील ती सर्वात लहान खेळाडू होती. तत्पूर्वी आसाम येथे 2021 मध्ये ज्युनियर नॅशनल गेम्समध्ये 100 मीटरमध्ये सिव्हर मेडल, 14 वर्षांखालील गटात भारतीय स्कूल गेम्स फेडरेशनमध्ये पंजाब येथे 100 मीटर रिलेमध्ये नवीन राष्ट्रीय विक्रमासह सुवर्णपदक, 14 वर्षांखालील गटात भारतीय स्कूल गेम्स फेडरेशनमध्ये पंजाबमध्ये 200 मीटरमध्ये उत्तम राष्ट्रीय विक्रमासह रौप्य पदक, 2018 आणि 2019 मध्ये भारतीय अ‍ॅथलेटिक्स फेडरेशनने तिरुपती येथे आयोजित दोन राष्ट्रीय आंतर-जिल्हा अ‍ॅथलेटिक मेळाव्यात 100 मीटरमध्ये तिसरे आणि दुसरे स्थान पटकावले. सिया ही सध्याची महाराष्ट्राची विक्रमवीर खेळाडू आहे.