अजित पवारांनी घेतली प्रकाश आंबेडकरांची भेट; चर्चांना उधाण
उपमुख्यमंत्री अजित पवार यांनी आज (दि.७) वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांची त्यांच्या निवासस्थानी जाऊन भेट घेऊन चर्चा केली. प्रकाश आंबेडकर यांच्या प्रकृतीबाबत त्यांची भेट घेतली असल्याचा खुलासा अजित पवार यांनी केला असला तरी त्याच्या भेटीमुळे राजकीय चर्चांना उधाण आले आहे.उपमुख्यमंत्री अजित पवार यांनी अॅड. प्रकाश आंबेडकर यांच्या भोसले नगर येथील निवासस्थानी जाऊन त्यांची आज (गुरूवारी) भेट घेतली. या भेटीदरम्यान त्यांच्यात राजकीय चर्चा झाली का? याचे कारण अस्पष्ट आहे. मात्र प्रकाश आंबेडकर यांच्या प्रकृतीबाबत विचारपूस करण्यासाठीच त्यांची भेट घेतली असल्याचा खुलासा अजित पवार यांनी केला आहे. तसेच त्यांची तब्येत आता बरी असून ते ९ तारखेला प्रचारासाठी बाहेर पडतील, असेही उपमुख्यमंत्री पवार यांनी माध्यमांशी बोलताना सांगितले.
