राजापूर शहराचा पाणीपुरवठा विस्कळीत झाल्याने माजी नगराध्यक्ष आक्रमक
राजापूर : शहरातील विस्कळीत झालेल्या पाणीपुरवठ्याच्या पार्श्वभूमीवर माजी नगराध्यक्ष अ‍ॅड. जमीर खलिफे यांच्यासह सहकारी नगरसेवकांनी मुख्याधिकारी प्रशांत भोसले यांची भेट घेत शहरातील पाणीपुरवठा तत्काळ सुरळीत करण्याची मागणी केली.
राजापूर शहराला पाणीपुरवठा करणाऱ्या कोदवली येथील सायबाच्या धरणाकडून येणार्‍या पाणीपुरवठा वाहिनीचा मुख्य वॉल अचानकपणे बंद झाल्याने व शिळ जॅकवेलकडील विजपुरवठ्यात तांत्रिक बिघाड निर्माण झाल्याने ऐन पावसाळ्यात शहरातील पाणीपुरवठा विस्कळीत झाला आहे. त्यामुळे नागरिकांची गैरसोय झाली आहे. मुस्लिम बांधवांचा सण असताना पाणीपुरवठा विस्कळीत झाल्याने प्रशासनासह लोकपतिनिधींना नागरिकांच्या रोषाला सामोरे जावे लागत आहे. या पार्श्वभूमीवर माजी नगराध्यक्ष अ‍ॅड .जमीर खलिफे यांच्यासह काँगेसचे तालुकाध्यक्ष व माजी नगरसेवक सुभाष बाकाळकर, माजी नगरसेवक सुलतान ठाकूर यांनी मुख्याधिकारी भोसले यांची भेट घेतली आणि तत्काळ पाणीपुरवठा सुरू करण्याची मागणी केली.
