शाळेच्या सहलीतील विद्यार्थी आरेवारे समुद्रात बुडत असताना स्थानिकांनी वाचवले

रत्नागिरी : कोल्हापूर येथून कोकणात सहलीसाठी आलेला विद्यार्थी आरेवारे येथील समुद्रात बुडत असताना त्याला स्थानिकांनी वाचवले. बुधवार 16 नोव्हेंबर रोजी दुपारी 1.30 वा. ही घटना घडली. आदित्य अरुण मंचावकर (वय 13, रा. उजगाव, कोल्हापूर) असे या विद्यार्थ्याचे नाव आहे. कोल्हापूर जिल्ह्यातील उजगाव येथील एका शाळेची सहल रत्नागिरीत आली होती.   आरेवारे येथे मंचावकर हा इतर मुलांसह समुद्राच्या पाण्यात खेळण्यासाठी गेला होता. काही वेळाने तो समुद्राच्या लाटांबरोबर पाण्यात ओढला जाऊ लागला. तेव्हा तेथे असलेल्यांनी आरडा-ओरडा करण्यास सुरुवात केली. त्यांचा आवाज ऐकून स्थानिक ग्रामस्थांनी समुद्रात उड्या मारून आदित्यला बाहेर काढले. त्याला जिल्हा शासकीय रुग्णालयात दाखल करून अधिक उपचारांसाठी कोल्हापूरला नेण्यात आले.