रायपाटण येथील वृद्ध महिलेच्या खून प्रकरणातील आरोपी अटकेत

रायपाटण येथील वृद्ध महिलेच्या खून प्रकरणातील आरोपी पोलिसांच्या ताब्यात आला आहे

कोल्हापूर-शाहूवाडी येथील कंक दाम्पत्याच्या खून प्रकरणात अटक करण्यात आलेला संशयित आरोपी विजय गुरव (४०, रा. शिरगांव ता. शाहूवाडी) याने पोलीस चौकशीदरम्यान रायपाटण येथील वृद्ध महिलेच्या खूनाची कबुली दिल्याने त्याला चौकशीसाठी राजापूर पोलिसांनी ताब्यात घेतल्याची माहिती समोर आली आहे.

१५ ऑक्टोबर रोजी रायपाटण-टक्केवाडीत घरात एकट्याच राहणाऱ्या ७४ वर्षीय महिला वैशाली शेट्ये या त्यांच्या घरी रक्ताच्या थारोळ्यात मृतावस्थेत सापडल्या होत्या. दरम्यान त्या महिलेचा मृत्यूही खूनच असल्याचा निष्कर्ष काढण्यात आला असून राजापूर पोलिसांकडून अज्ञात आरोपीविरोधात खूनाचा गुन्हा नोंदवला होता. दरम्यानच्या काळात कडवी (ता. शाहूवाडी) धरण पाणलोट क्षेत्रातील गोलीवणे वसाहत येथे १९ ऑक्टोबर रोजी निनू यशवंत कंक (७०), त्यांच्या पत्नी रखुबाई निनू कंक (६५) यांचे मृतदेह आढळून आले होते. या प्रकरणी स्थानिक गुन्हे अन्वेषणच्या पथकाने तपास करुन सराईत गुन्हेगार विजय गुरवला ३१ ऑक्टोबर रोजी जेरबंद केले होते. त्यानंतर स्थानिक गुन्हे अन्वेषणसह शाहूवाडी पोलिसांनी केलेल्या चौकशीत विजय गुरवनेच रायपाटणमधील वैशाली शेट्येंचा खून केल्याची माहिती समोर आली होती. विजय गुरव हा सराईत गुन्हेगार असून १३ ऑक्टोबर रोजी रात्री शेट्ये यांच्या घरात चोरीच्या उद्देशाने घुसून चोरी करण्याचा प्रयत्न केला. यावेळी शेट्ये यांनी प्रतिकार केल्यानंतर घरातील वरवंट्याने ठेचून त्यांचा खून केल्याची कबुली गुरवने दिली. त्यामुळे रायपाटण येथील वृद्ध महिलेल्या खून प्रकरणाच्या तपासासाठी राजापूर पोलिसांनी विजय गुरवला ताब्यात घेतले आहे.