अलिबागमध्ये राजकीय वातावरण तापले असताना आता अघोरी बाबांची एन्ट्री

रायगड जिल्ह्यात नगरपालिका निवडणुकीच्या पार्श्वभूमीवर राजकीय वातावरण तापले असतानाच आता परिसरात आता अलिबाग परिसरात अघोरी बाबांची एन्ट्री झाली आहे. अलिबाग शहरातील कोळीवाडा परिसरात उत्तर प्रदेश आणि मध्य प्रदेश मधून आलेले अघोरी बाबा फिरण्यास सुरुवात झाल्याने निवडणुकीला धार्मिक रंग देण्याचा प्रयत्न सुरू असल्याची चर्चा सुरू झाली आहे.

निवडणुकीच्या तोंडावर ज्या काही घटना घडतात, त्या कडे लोक संशयित नजरेने बघतात. समाज कितीही शिकला तरी काही रूढींचा पगडा त्यांच्यावर असल्याचे पहायला मिळते. अलिबाग मध्ये निवडणुकीच्या तोंडावर अघोरी बाबांचा वावर वाढल्याची चर्चा शहरात रंगली आहे. निवडणुकीच्या काळात हे अघोरी बाबा कशासाठी आले याचा उलगडा अद्याप होऊ शकलेला नाही.

निवडणुकीच्या पार्श्वभूमीवर काळया जादूचा प्रयोग करण्यात आल्याची चर्चाही ऐकावयास मिळत आहे. निवडणूक लढविताना विविध प्रयोग आजमावले जातात . वेगवेगळया मार्गाने आणि माध्यमातून उमेदवार मतदारांपर्यंत पोहचण्याचा प्रयत्न करीत असताना, आजकाल बुवाबाजी चा पर्याय देखील निवडला जात असल्याचे ऐकावयास मिळते. अलिबाग नगरपालिका निवडणुकीसाठी प्रचाराचा वारू उधळला असताना, शहरात उत्तर प्रदेश,बिहार येथील बाबा(अघोरी प्रकार करणारे) कोळीवाडा परिसरात फिरत असताना आढळून आल्याचे चर्चिले जात आहे. हे अघोरी बाबा, काही उमेदवारांच्या संपर्कात असल्याची चर्चा देखील ऐकावयास मिळत आहे.

निवडणूक प्रचार सुरू असताना, आणि प्रत्यक्षात निवडणुकीला कमी कालावधी असताना समोर आलेल्या या चर्चेने खळबळ उडून दिली आहे. जेव्हा स्वतःवरील विश्वास संपुष्टात येतो तेव्हा,लोक बुवाबाजी कडे वळतात. जे उमेदवार अशा अघोरी बाबाच्या संपर्कात आले ,त्यांना स्वतःच्या कुवतीवर विश्वास नसल्याने असे प्रकार आजमावत असावेत अशी प्रतिक्रिया एका राजकीय नेत्याने व्यक्त केली.

विरोधकांना नैराश्य आले आहे, पराभव समोर दिसायला लागल्याने बुवाबाजी आणि अघोरी प्रकार करण्याचे प्रकार प्रयत्न सुरू केले आहेत, असे मत माजी नगराध्यक्ष प्रशांत नाईक यांनी व्यक्त केले