वीरश्री ट्रस्ट, धन्वंतरी रुग्णालयाचे हातखंबा व चांदेराई येथे आशा सेविका मार्गदर्शन शिबीर.
रत्नागिरी : रत्नागिरीतील वीरश्री ट्रस्ट आणि धन्वंतरी रुग्णालयातील रत्नागिरी टेस्ट ट्यूब बेबी सेंटरच्या माध्यमातून हातखंबा प्राथमिक आरोग्य केंद्र आणि चांदेराई प्राथमिक आरोग्य केंद्र येथे आशा सेविकांचे मार्गदर्शन शिबिर नुकतेच पार पडले. या वेळेला आशा सेविकांना आरोग्य विषयक मार्गदर्शन करण्यात आले. वीरश्री ट्रस्ट आणि धन्वंतरी रुग्णालय सातत्याने रत्नागिरीतील आरोग्यविषयक क्षेत्रामध्ये काम करत आहे. याचाच एक भाग म्हणून गावातल्या घराघरात पोहोचणाऱ्या आशा सेविकांना आरोग्य विषयक अत्याधुनिक माहिती देण्यासाठी या शिबिराचे आयोजन करण्यात आलं होतं. यावेळी हातखंबा प्राथमिक आरोग्य केंद्राच्या वैद्यकीय अधिकारी डॉ. प्रियांका माने आरोग्य सहाय्यक श्री. झोरे, आरोग्य सहायिका श्रीमती देसाई, आशा पवार, गटप्रवर्तक तन्वी बोरकर आणि सायली शेटे उपस्थित होते. या वेळेला आशा सेविकांना विविध विषयांवर त्यातही वंध्यत्व या विषयावर आवर्जून मार्गदर्शन करण्यात आले. आशा सेविका या ग्रामीण भागातील घराघरातल्या आरोग्य क्षेत्राच्या दुवा आहेत. तेथील जेष्ठ नागरिक, मुलं, आणि विशेषता महिलांच्या आरोग्याची काळजी या आशा सेविका घेत असतात. त्यामुळे त्यांचे या समाजातलं स्थान महत्त्वाचे आहे असे या वेळेला प्रतिपादन करण्यात आले. याच वेळेला चांदेराई प्राथमिक आरोग्य केंद्र येथे सुद्धा आशा सेविका मार्गदर्शन शिबिर घेण्यात आले. यावेळेला वैद्यकीय अधिकारी डॉ. शीतल सूर्यवंशी आणि गटप्रवर्तक एच. डी. इंदुलकर उपस्थित होते. तर वीरश्री ट्रस्ट आणि रत्नागिरी टेस्ट ट्यूब बेबी सेंटर कडून प्रशासकीय विभागाचे शैलेश धुळप, एम्ब्रियोलॉजिस्ट श्वेता कदम, परिचारिका प्रियांका मासये उपस्थित होत्या.
