
चिपळुणातील वाळू व्यावसायिकांचे २६ पासून आमरण उपोषण
वाळूच्या नवीन धोरणामध्ये अद्याप अपारंपारिक हातपाटी व्यवसायाचा समावेश न केल्याने येथील वाळू व्यावसायिक २६ जानेवारीपासून प्रांत कार्यालयाजवळ आमरण उपोषणाला बसणार आहेत. तसे निवेदन त्यांनी प्रांताधिकारी आकाश लिगाडे यांना दिले आहे. महिनाभरापूर्वी केलेल्या उपोषणादरम्यान दिलेल्या आश्वासनांची पूर्तता न झाल्याने हे पाऊल उचलल्याचेही यात नमूद करण्यात आले आहे.
या निवेदनात म्हटले आहे की, वाळूच्या नवीन धोरणामध्ये हातपाटी व्यवसायाचा समावेश न करून घेतल्यामुळे आम्ही पारंपारिक हातपाटी व्यावसायिकांनी १८ डिसेंबर रोजी आपल्या कार्यालयासमोर उपोषण केले होते. त्यावेळी आपण स्वतः पालकमंत्री उदय सामंत, आमदार शेखर निकम यांच्याबरोबर दूरध्वनीद्वारे चर्चा केली होती. त्यावेळी हा प्रश्न ८ ते १० दिवसात मार्गी लावण्याचे आश्वासन दिले होते. मात्र याला महिन्याचा कालावधी होत आला असून हातपाटी व्यवसायास अद्याप परवानगी मिळालेली नाही, तसेच सदर प्रश्नी कोणत्याही प्रकारची बैठक देखील झालेली नाही.
www.konkantoday.com