संचित रजेचा गैरफायदा घेऊन फरार झालेल्या आरोपीलादोन वर्षाची सक्तमजूरी

रत्नागिरी:- कोल्हापूर येथील मध्यवर्ती कारागृहात शिक्षा भोगणाऱा मोईन काझी हा आरोपी संचित रजेचा गैरफायदा घेऊन फरार झाला. जन्मठेपेची शिक्षा भोगणाऱ्या आरोपीचा पोलिसांनी शोध घेऊन त्याला पुन्हा पकडले. न्यायालयाने आरोपीला दोन वर्षाची सक्तमजूरीची शिक्षा ठोठावली.

मुईन मोहम्मद युसुफ काझी उर्फ मोईन उर्फ रॉनी बिझा उर्फ हेमंत शहा (वय ३३, रा. कुवारबाव, रत्नागिरी) असे आरोपीचे नाव आहे. कोल्हापूर येथील मध्यवर्ती कारागृहात शिक्षा भोगत असलेला मोईन हा फरार झाल्याचा त्याच्यावर आरोप ठेवण्यात आला होता. मोईन याने आपला गुन्हा न्यायालयापुढे कबुल केला. रत्नागिरी प्रथमवर्ग न्यायदंडाधिकारी माणिकराव सातव यांनी या खटल्याचा निकाल दिला. पोलिसांनी दिलेल्या माहितीनुसार मोईन काझी याने तालुक्यातील पोमेंडी-बुद्रूक येथे शहरातील शिवाजीनगर भागात राहणार्‍या अभिजित शिवाजी पाटणकर या तरुणाचा तीन गोळ्या झाडून निर्घृण खून केल्याचा आरोप होता. या आरोपाखाली सत्र न्यायालयाकडून त्याला जन्मठेपेची शिक्षा ठोठावण्यात आली होती. त्यानुसार मोईन काझी हा कोल्हापूर मध्यवर्ती कारागृह येथे शिक्षा भोगत होता. कोल्हापूर कारागृह प्रशासनाकडून मोईन याला ८ जुलै ते ४ ऑगस्ट २०२३ अशी २८ दिवसांची संचित रजा मंजूर केली होती. त्यानुसार मोईन काझी हा कारागृहातून बाहेर पडला होता. संचित रजेच्या पुर्वी ५ ऑगस्ट २०२३ ला तो पुन्हा कारागृहात हजर होणे अपेक्षीत असताना तो फरार झाला.

या प्रकरणी मोईन काझी यांच्याविरुद्ध भादवी कलम २२४ नुसार गुन्हा दाखल करण्यात आला होता. तसेच पोलिसांकडून त्याचा शोध घेतला जात होता. अखेर पोलिसांकडून मोईन याला ताब्यात घेऊन न्यायालयापुढे हजर करण्यात आले. यावेळी मोईन काझी याने आपला गुन्हा कबुल केला. न्यायालयाने त्याला दोन वर्षाची सक्तमजुरीची शिक्षा ठोठावली.
www.konkantoday.com